Ձեր վստահելի աղբյուրը

ԱԺ-ում քննարկվում է ԱԺ պատգամավորների ¼-ի նախաձեռնությամբ ներկայացված «Սահմանդրական փոփոխությունների նախագիծն առաջին ընթերցմամբ ընդունելու մասին հարցը։

Հիմնական զեկուցող, «ԱԺ «Իմ քայլը» խմբակցության անդամ Վահագն Հովակիմյանն իր խոսքում հայտարարեց՝ փոփոխությունը վերաբերում է Սահմանդրության 213 հոդվածին։

Գործող հոդվածը սահմանում է. «Հոդված 213. Սահմանադրական դատարանի անդամների և նախագահի պաշտոնավարումը
Մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահը և անդամները շարունակում են պաշտոնավարել մինչև իրենց լիազորությունների՝ 2005 թվականի փոփոխություններով Սահմանադրությամբ սահմանված ժամկետի ավարտը: Սահմանադրության 7-րդ գլխի ուժի մեջ մտնելուց հետո Սահմանադրական դատարանի դատավորների թափուր տեղերի համար առաջադրումները կատարում են հաջորդաբար Հանրապետության նախագահը, դատավորների ընդհանուր ժողովը և Կառավարությունը»։

Նախագծով առաջարկվում է. «Հոդված 213. Սահմանադրական դատարանի անդամների և նախագահի պաշտոնավարումը

Մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների պաշտոնավարումը դադարում է»։

Հովակիմյանն ասաց, այսօր ՍԴ-ն հանրային ամենացածր վստահությունը վայելող պետական մարմինն է։

«Մի պետական մարմին, որը դե ֆակտո իր լիազորություններն իրականացնում է, բայց երբ խնդիր ունենա այս մարմինը հնչեղ հարցի վերաբերյալ որոշում կայացնելու, նույնիսկ եթե ամենաիդեալական որոշումն էլ կայացնի, էս իր տոտալ անվստահության իրավիճակում, միևնույն է, այդ որոշումը վիճարկվելու է հանրության կողմից, հանրությունը չի ընդունելու այդ որոշումը։
Հանրությունը ի դեմս այս Սահմանդրական դատարանի տեսնում է այն Սահմանդրական դատարանին, որը տարիներ շարունակ ծեծերը, ջարդերը, ընտրությունների կեղծումները դակում էր, հաստատում էր, ասում էր՝ դե լավ թեթև բան է եղել, մի քիչ կեղծել են, բայց չի ազդել արդյունքների վրա։

2008-ին էլ ծեծել են, դե ասենք  տասը մարդ են սպանել, կեղծել են, դե հմի։ Ու էսպես շարունակ, ու սրանով է պայմանավորված, որ հանրությունն ուղղակի չի վստահում Սահմանդրական դատարանին և սա փաստ է, սա ոչ ոք չի կարող ժխտել»,-նման նախագիծ ներկայացնելու անհրաժեշտությունն այսպես բացատրեց իմքայլական պատգամավորը, ով նախագծի հեղինակներից է։

Հովակիմյանը նշեց, ՍԴ ներկայիս կազմի մնալու դեպքում պահպանվելու է 2015 թ. Սահմանդրությամբ ընտրված դատավորների ու մինչ այդ նշանակված անդամների պաշտոնավարման ժամկետների միջև առկա էական տարբերությունը։

«Մինչ նորընտիր երկու դատավորները պաշտոնավարելու են իրենց ընտրվելու պահից 12 տարի, իսկ նշանակված դատավորներից երկուսը պաշտոնավարելու է մինչև 70 տարեկանը լրանալը, 5-ը՝ մինչև 65 տարեկան լրանալը։ Արդյունքում մենք ունենք մի իրավիճակ, երբ ՍԴ-ում ունենք մի անդամ, որ պաշտոնավարելու է 33 տարի, ուղղակի հակասելով Սահմանդրության այսօրվա 7-րդ գլխին, իսկ նորընտիր անդամները պաշտոնավարելու են 12 տարի»,- խնդիրը ներկայացրեց նա։

Հովակիմյանը նաև ընդգծեց, որ հեղափոխությունից հետո, որքան էլ ցավալի է, Հրայր Թովմասյանը շարունակեց հանդես գալ իր քաղաքական թիմի անդամ։

«Նա շարունակեց հանդես գալ որպես քաղաքական ընդդիմադիր Հայաստանի Հանրապետության ժողովրդի կամքով ընտրված իշխանություններին։ Փաստորեն վերջին 20 տարում առաջին անգամ՝ 2018-ի դեկտեմբերին ընտրվել է խորհրդարան, որն ընտրվել է Սահմանդրության 2-րդ հոդվածի ոգուն, տառին համապատասխան, մի մազաչափ շեղում չի եղել այդ տառից, և Հրայր Թովմասյանը դիրքավորվեց որպես այդ իշխանության ընդդիմախոս։ Ինքն իր գործունեությունը ոնց էր բնութագրել՝ խրամատում դիրքավորված։ Ես մի բանում համոզված եմ, որ այդ խրամատը հայ դիրքապահների խրամատը չի, որովհետև հայ դիրքապահի խարամատը դիմացը ունի թշնամի։ Հրայր Թովմասյանի խրամատի դիմաց Հայաստանի Հանրապետության ժողովուրդն է, և դա հաստատ մեր հայ դիրքապահների խրամատը չէ, որտեղ տեղակայվել է Հրայր Թովմասյանը»,-խոսքը շարունակեց իշխանական պատգամավորը։

Ինչ վերաբերում է այս խնդրի լուծմանը, ապա Հովակիմյանը նշեց, կառավարությունն ու օրենսդիր մարմինն ամեն ինչ արել են ՍԴ շուրջ եղած ճգնաժամը լուծելու համար, բայց ՍԴ անդամները չեն ցանկացել մասնակցել խնդրի հանգուցալուծմանը։

«Ես ուզում եմ նաև տեղեկացնել, որ «Իմ քայլը» խմբակցությունն առաջին ընթերցմամբ չի ընդունելու սույն նախագիծը։ Սահմանադրության 202-րդ հոդվածի 3-րդ կետի ուժով Ազգային Ժողովին տրված լիազորությամբ առաջարկելու է քվեարկության դնել այս նախագիծը համաժողովրդական հանրաքվեի ներկայացնելու մասին որոշումը։ Սա ուղիղ ժողովրդավարության կիրառում է, ինչպես ասել ենք, մենք հավատում ենք մեր ժողովրդին, ասելիք ու լսելիք ունենք մեր ժողովրդից»,-ելույթն ավարտեց հիմնական զեկուցողը։