Ձեր վստահելի աղբյուրը

Եթե մարդիկ ուզում են ստեղծել սպանդանոց, ձեռք բերել շարժական սպանդանոց կամ իրականացնել կենդանի կամ մորթված կենդանիների տեղափոխում, ի՞նչ պետք է անեն այդ մարդիկ։ Այսօր կառավարության նիստի ընթացքում սպանդանոցների կառուցման հարցի քննարկմանը նման հարց բարձրացրեց ՀՀ վարչապետ Նիկոլ Փաշինյանը՝ դիմելով ՍԱՊԾ ղեկավար Գեորգի Ավետիսյանին։

Պատասխանելով վարչապետի հարցին՝ Ավետիսյանը նշեց, որ այդ մարդիկ պետք է դիմեն սննդի անվտանգության տեսչական մարմին։

Վարչապետը հետաքրքրվեց՝ արդյոք կան տարածքային մարմիններ, թե պետք է այդ մարդիկ գան Երևան։

Ավետիսյանը պատասխանեց՝ կան տարածքային մարմիններ, ինչպես նաև տարբեր տարածաշրջաններում կան շենքեր, որտեղ գտնվում է ՍԱՏՄ գրասենյակը։

«Առաջին հերթին մարդը պետք է հողի կամ շինության սեփականության վկայականով գա տեսչական մարմին, որ մեր տեսուչները տեղում հասկանան տվյալ տարածքի համապատասխանությունը։ Օրինակ, տարածքը մանկապարտեզին, դպրոցին կպած չի կարող լինել, հանրային վայրերին և բնակելի հատվածից էլ 300-500 մետր հեռավորություն պետք է ունենա»։

Վարչապետը հանձնարարեց հրապարակել այն չափանիշները, որոնց պետք է համապատասխանի տարածքը, որը քաղաքացին ցանկանում է դարձնել սպանդանոց։

Գեորգի Ավետիսյանը նաև հայտնեց, որ հաջորդ քայլում մարզպետարանը կամ  համայնքապետարանը պետք է ճշտեն հողի նշանակությունը. «Դրանից հետո մենք ամբողջ խորհրդատվությունը տալիս ենք, ինչպես և ինչ ձև պետք է ունենա այդ սպանդանոցը։ Մենք տիպային նախագիծը տալիս ենք, և քաղաքացիները պետք է գնան մարզպետարաններ և համայնքապետարաններ՝ այն ստանալու»։ 

ՀՀ էկոնոմիկայի նախարար Տիրգրան Խաչատրյանը նշեց, որ սպանդանոցների նախագծումը մասնավոր սեկտորը պետք է իրականացնի. «Մասնավոր հատվածը պետք է սահմանի նախագիծ, որը համապատասխանում է ՀՀ կառավարության սահմանած նվազագույն սանիտարա-հիգիենիկ պահանջները պահելու կանոններին։ Երբ այդպիսի նախագիծը ՍԱՏՄ հետ խորհրդակցության արդյունքում պատրաստ է, դիմում են ֆինանսավորող կառույցին»։

Վարչապետը ՀՀ ԿԱ քաղաքաշինության պետական կոմիտեի նախագահի տեղակալ Արմեն Ղուլարյանից հետաքրքրվեց, թե ինչ պետք է անել, որպեսզի նախագծման գործընթացում մարդկանց աջակցի կառավարությունը։

Վերջինս նշեց, որ նախկինում գյուղնախարարությունը և ՍԱՏՄ-ն միասին մշակել են էսքիզային տարբերակներ՝ տարբեր հզորություն ունեցող սպանդանոցների համար որպես ուղեցույց. «Նախ և առաջ պետք է տվյալ քաղաքացին համայնք դիմի, այնտեղ ստանա նախագծման համապատասխան թույլտվություն, որի հիման վրա պետք է նորմերին համապատասխան նախագիծն արվի։ Այսօր գործող սանիտարական նորմերը լուրջ խնդիր են առաջացնում, որովհետև մեր երկրի համար ուղղակի շատ մեծ սահմանափակումներ են դնում։ Բացի այդ, պետք է մենք շատ արագ ստանանք հնարավորություն մշակելու տիպային մի քանի նախագծեր, որպեսզի տրամադրենք համայնքներին»։

Վարչապետը հանձնարարեց հնարավորինս արագ կազմակերպել գործընթացը, որպեսզի մարդիկ քաշքշուկի մեջ չընկնեն։

Փաշինյանը տարածքային կառավարման և ենթակառուցվածքների նախարար Սուրեն Պապիկյանին էլ հանձնարարեց, որպեսզի հետևի, որ համայնքների ղեկավարներն ու ճարտարապետները տեխնիկական առաջադրանքները հնարավորինս արագ կազմակերպեն և խնդիրներ չառաջացնեն։