Ձեր վստահելի աղբյուրը

«Իրատես» թերթը գրում է. «Զարմանալի ազգ ենք։ Նիկոլ Փաշինյանի իշխանություն գալուց հետո գրեթե ամեն օր քննարկումների ծիրում էր այն, որ իշխանությանը հակակշռող ընդդիմություն չի ստեղծվում, չկա, չի ձևավորվում։ Հիմա էլ պարզվում է, որ որոշ ուժեր փորձում են այս հարցում համախմբում իրականացնել, բայց նույն ընդդիմադիր հատվածից արդեն խանգարողներ կան։

Մեր տեղեկություններով, այս օրերին ընդդիմադիր որոշ թևերի շրջանում սկսվել է ակտիվ պայքար՝ դաշտը նոր դեմքերի, ուժերի չթողնելու համար։ Կարապ-խեցգետին-գայլաձուկ եռյակի պես ամեն մեկը փորձում է իրենով ծածկել արտախորհրդարանական ընդդիմադիր հատվածը։

Ի դեպ, նրանց չի էլ հետաքրքրում, որ հին դեմքերը և ուժերը հանրային վստահության խնդիր ունեն։ Ոչ մեկը չի փորձում զիջել, ասպարեզը թողնել։ «Ոչ ոք չի ուզում տանուլ տալ, բոլորդ էլ վերցնել եք ուզում. բոլորինը` ինձ, իմը՝ ինձ, նրանը՝ ինձ, քոնը՝ ինձ։ Մազալու են մարդիկ»,- կասեր հայտնի ֆիլմի նույնքան հայտնի հերոսը, որը պատկերավոր բնութագրում է մեր այսօրվա վիճակը։ Իսկապես «մազալու» են այս ընդդիմադիրները»:

Մանրամասները թերթի այսօրվա համարում։