Ձեր վստահելի աղբյուրը

Սահմանադրական ճգնաժամ՝ որպես այդպիսին գոյություն չունի, դա շինծու օրակարգ է։ Այսօր  լրագրողների հետ զրույցում այս մասին ասաց ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը։

Պատգամավորը նշեց, որ ճգնաժամ կլիներ այն դեպքում, երբ ՍԴ-ն հնարավորություն չունենար իրականացնել իր առջև դրված պարտականությունները։ Ըստ նրա՝ չկա դեպք, որ ՍԴ-ն դիմում ստացած լինի և չկարողանա գործը քննել և որոշում ընդունել։

Գևորգ Պետրոսյանը ցավով նշեց, որ ԱԺ-ում ավելի շատ ճգնաժամ կա. «Կա իրար նկատմամբ վստահության, հանդուրժողականության ճգնաժամ։ Էստեղ ավելի շատ է թշնամանքը, քան ՍԴ-ում։ Ասել եմ և կրկնում եմ, բայց էնտեղ մի ճգնաժամ կա, և դուք գիտեք՝ ով է այդ ճգնաժամը։ Էդ ո՞նց ա՝ մինչև իր էնտեղ հայտնվելը ՍԴ-ը բնականոն գործում էր, հիմա՝ իր հայտնվելուց հետո ՍԴ-ն հայտնվեց ճգնաժամի մե՞ջ։ ՍԴ-ում ճգնաժամ չկա, այլ է խնդիրը, որ այն յուրայիններով լցնելու ցանկությունը մարդիկ ուզում են բխեցնել իրավիճակից, թե իբր ճգնաժամ կա, բա ինչ պիտի անենք, ոնց պիտի անենք»,- նշեց Պետրոսյանը։

Ըստ նրա՝ իշխանությունն արդեն որևէ կերպ չի թաքցնում, որ այս ամենը քաղաքական բովանդակություն ունի․«Էդ մասին ասել է և՛ փոխվարչապետը, և՛ մի շարք պատգամավորներ, և՛ ՍԴ ինքնահռչակ նախագահը։ Ինքն առաջին օրն ասեց, որ այս խնդիրն ունի քաղաքական բովանդակություն։ Հիմա բանը հասել ա նրան, որ անթաքույց ասում են՝ սա մեր իշխանության դատարանը չի»։

Պետրոսյանը հարց հնչեցրեց՝ ի՞նչ է նշանակում իշխանության դատարան, ո՞վ է ասում, որ ՍԴ-ն պետք է ծառայի օրվա իշխանություններին, կատարի նրանց պատվերը.

«Եթե ամեն իշխանություն իր հետ իր դատական իշխանությունը բերի, էդ կլինի անկախ դատարա՞ն։ Կատեգորիկ պետք է մերժել այդ մոտեցումը, որ ցանկացած նոր իշխանություն պիտի ունենա իր սեփական դատարանն ու դատավորը։ Եթե էդ տրամաբանությամբ շարժվենք, ապա էսօր ամբողջ դատական համակարգի 70 տոկոսը նշանակված է նախկին իշխանության կողմից։

Դե բերեք էդ 70 տոկոսին հանեք աշխատանքից, հլը տենամ ո՞վ է քրեական ու քաղաքացիական գործերը քննելու։ Էսպես որ լինի, ամբողջ պետական ապարատը մենք հնձում ենք, և տեղը ո՞ւմ ենք բերում, մի մարդ, ով աշխատանքի չի ներկայանում, ստանում է աշխատավարձ, պարգևատրում։ Խոսքը ՍԴ իշխանական դատավորի մասին է։ Է՞ս ա իշխանության դատավորը»։

Պետրոսյանը նշեց նաև, որ երեկ ԱԺ բոլոր ելույթներն ուղղված էին Հրայր Թովմասյանի դեմ, իր ընտրվելու օրը Հրայր Թովմասյանին այդքան չներկայացրեցին, ինչքան երեկ:

«Ամբողջ խնդիրն այն է, որ այստեղ անձնավորված պայքար է, մենք անձերի համար չենք պայքարում, մենք ինստիտուցիոնալ համակարգի համար ենք պայքարում: «Բարգավաճ Հայաստանը» Հրայր Թովմասյանին դեմ է քվեարկել, մեզ ուզում են կապեն սրա, նրա հետ, փորձում են լսել՝ շաղախված ենք սրա-նրա հետ, չկա նման բան, եթե մենք ինչ-որ մարդկանց հետ շաղախված լինեինք, ի՞նչն էր խանգարելու, որ ասեինք։ Մեր պայքարը Թովմասյանի դեմ չի, մինչդեռ իշխանության պայքարը հենց իր դեմ ա»,- նշեց Պետրոսյանը։

Նրա խոսքով, ՍԴ-ն այժմ ունի 7 դատավոր՝ 2-ը իշխանության կողմից նշանակված։ Այս դեպքում ևս մյուս 5 դատավորների մասին որևէ խոսք չկա։

«Հիմա ո՞վ կտա այս հարցի պատասխանը, այդ մեղքերը, որ վերագրում են ՍԴ-ին, ասում են էսպիսի բաներ են արել։  Մենք չենք արդարացնում ՍԴ-ի նախկինում արած «հերոսությունները», բայց ոչինչ որ այդ «հերոսությունները» արվել են այն ժամանակ, երբ Թովմասյանը բացարձակապես կապ չի ունեցել ՍԴ-ի հետ: Հրայր Թովմասյանի օրոք ես չեմ լսել որևէ դժգոհություն ՍԴ որևէ որոշումից։ Էն ժամանակ շատ եմ լսել, այո, նախկին իշխանությունների օրոք ՍԴ-ն վերածվել էր իշխանության կամքը կատարող մարմնի։ 

Ես ինքս էլ շատ եմ բողոքել, բայց մենք մոռանում ենք, որ խոսքը ամբողջ մարմնի մասին է, անդրադառնում ենք անձին։ Նրանից ազատվելու համար 60-70 մլն ծախսում ենք, բա ասում ենք՝ բյուջեում գումար չկա, որ  թոշակ բարձրացնեն, նվազագույն աշխատավարձ բարձրացնեն»,- ասաց նա:

Պատգամավորը նաև ասաց, որ վիրավորվում է, երբ մարդիկ խոսում են ՀՀ բոլոր քաղաքացիերի անունից։ 

Պետրոսյանը նշեց, որ մարդկանց 70-80 տոկոսին չի հետաքրքրում՝ ով է ՍԴ նախագահը, նրանց խնդիրն այդ չէ, սահմանից մինչև Հանրապետության հրապարակ դժգոհություն է, ակցիաներ են, օրը մի հանրապետական նշանակության մայրուղի է արգելափակվում գյուղացիների կողմից, որովհետև այդ մարդիկ իրենց խնդիրների հետ մնացել են միայնակ:

«Այն ժամանակ, երբ արդեն ներքաղաքական վտանգի զգացում, ինտրիգային բաներ չկա, մոռանում են, որ հպարտ քաղաքացի է, կոչում են անգրագետ պողոսներ, հիմա, երբ հայտնվեց հանրաքվեի մշուշոտ հեռանկարը, արդեն հիշեցին հպարտ քաղաքացիներին»,- ասաց նա: