Ձեր վստահելի աղբյուրը

ԿԸՀ նախագահ Տիգրան Մուկուչյանն այսօր խորհրդարանում մասնակցել է օրենսդրական կարգավորումների վերաբերյալ քննարկումների։

Նրա խոսքով, այն օրենքները, որոնք ԿԸՀ-ն կիրառում է, ունեն որոշակի խնդիրներ, և հենց այդ խնդիրների մասին է ինքը բարձրաձայնել ԱԺ-ում։

«Քննարկման շրջանակը եղել է շատ լայն, քննարկվել են տարբեր օրենսդրական ակտեր։ Ինչ վերաբերում է հանրաքվեին, կոնկրետ այն նշանակվելուց հետո, երբ կսկսվեն ԿԸՀ գործառույթները, մենք լիարժեք ծավալով կիրազեկենք հասարակությանը»,- նշեց Մուկուչյանը։

Նրա խոսքով, այսօր գործող «Հանրաքվեի մասին ՀՀ օրենքում» ամրագրված ժամկետներն ավելին են, քան արտահերթ ընտրությունների համար նախատեսված ժամկետները։

Հարցին, թե հատկապես ինչ ձևակերպումներով է շրջանառության մեջ դրվելու քվեաթերթիկը, Մուկուչյանը պատասխանեց, որ այս պահին նման որևէ դատողություն անել չի կարող։

«Դրանք իրավական գործընթացներ են, որոնք հետևում են մեկը մյուսին։ Այսինքն՝ նշանակվում է հանրաքվե, որից հետո սկսվում են առանձին կազմակերպական գործընթացներ, զուգահեռաբար իրականացվում է քարոզչության գործընթաց։ Էդ ընթացքու արդեն նաև հստակ է լինում, թե ինչ հարցի վերաբերյալ է կազմակերպվում հանրաքվեն, հետո նոր միայն արդեն սահմանված կարգով ստեղծվում է քվեաթերթիկի նմուշ, ապա տպագրվում է»,- ասաց Մուկուչյանը։

Այս պահին ԿԸՀ-ում սահմանադրական փոփոխությունների հանրաքվեի համար որևէ մեկնարկ տրված չէ, ինչը Մուկուչյանի խոսքով, նշանակում է՝ իրավական որևէ հիմա գործընթացի մեկնարկի առումով ԿԸՀ-ում առկա չէ։

Հարցին, թե կա օրենքում որևէ կետ, որն այս պահին ԿԸՀ-ին խանգարում է անցկացնել սահմանադրական փոփոխությունների հանրաքվե, Մուկուչյանը պատասխանեց, որ ավելի լայն շրջանակով հարցեր են քննարկվել խորհրդարանում.

«Ես եկել էի ավելի լայն հարցերի շրջանակ քննարկելու համար։ Մեր կիրառության ենթակա օրենսդրական ակտերի շրջանակը շատ ավելի լայն է, քան միայն հանրաքվեի մասին օրենքը։  Նկատառումները կան, և ըստ այդմ ԿԸՀ-ն իր իրավական դիրքորոշումները կձևավորի»։

Թե երբ կանցկացվի հանրաքվեն, Մուկուչյանը դժվարացավ պատասխանել։ Նա նշեց, որ օրենքում ամրագրված է իրավական դրույթ, որով սահմանված են ժամկետի սկիզբն ու ավարտը՝ 50-65 օր. «Թե այդ ընթացքում որ օրը կնշանակվի, արդեն կորոշի հանրապետության նախագահը, դա ԿԸՀ գործառույթը չէ»։

Դիտարկմանը, որ նախկինում Մուկուչյանը շատ է քննադատվել վարչապետ  Փաշինյանի կողմից, երբ վերջինս ընդդիմադիր գործիչ էր, և այդ պայմաններում արդյոք հեշտ է աշխատել վերջինիս հետ,  Մուկուչյանը պատասխանեց, որ ԿԸՀ-ն անկախ հանձնաժողով է, որի կարգավիճակը սահմանված ա Սահմանադրությամբ և ընտրական օրենսգրքով։

«Կա ընտրական օրենսգիրք, որի կանոնակարգումներին համապատասխան մենք կազմակերպում ենք ընտրական գործընթացը։ Ինչպիսին որ այդ կանոնակարգումներն են, դրան համապատասխան էլ կազմակերպվում է ընտրական գործընթացը։ Մենք միշտ աշխատել ենք՝ հիմնառանցք ունենալով օրենսդրական կարգավորումները»։