Ձեր վստահելի աղբյուրը

Հայ կոմպոզիտորական արվեստի 11-րդ փառատոնն այս տարի յուրահատուկ է՝ նվիրված է մեծ կոմպոզիտոր Ալեքսանդր Հարությունյանի 100-ամյա հոբելյանին: Լրագրողների հետ հանդիպմանն ասաց կոմպոզիտոր‚ ՀՀ արվեստի վաստակավոր գործիչ Երվանդ Երկանյանը:

«Ալեքսանդր Հարությունյանն այն կոմպոզիտորներից է, որը հսկայական դեր և ազդեցություն է թողել մեր սիմֆոնիկ երաժշտության մեջ և մի ամբողջ դարաշրջան ներկայացրել ամենաբարձր մակարդակում: Նա դեռ 30 տարին չբոլորած՝ հայտնի էր նախկին Խորհրդային միության սահմաններում, պատվով ու փառքով ներկայացնում էր Հայաստանը: Նրա բազմաժանր ստեղծագործություների մեջ սիմֆոնիկ երաժշտությունը կարևագույն մասն է կազմում»,- ասաց նա:

Ասուլիսին ներկա Հայաստանի ազգային ակադեմիական երգչախմբի գեղարվեստական ղեկավար և գլխավոր դիրիժոր Հովհաննես Չեքիջյանն ասաց, որ մեծ ոգևորությամբ են պատրաստվում այս փառատոնին, առաջին համերգին հենց իրենք են հանդես գալու:

«Բացառիկ հայ կոմպոզիտոներից է, որ ստեղծել է դասական երաժշտություն հայկական մոտիվներով: Եղել է ոգևորված հայկական երաժշտությամբ և իսկական հայկական երաժշտության մեկնաբանողն է: Ալեքսանդր Հարությունյանի ստեղծագործությունները շատ են կատարել, մենք էլ իր կենդանության ժամանակ շատ ենք կատարել: Հիմա մեծ հարգանքով, մեծ պատասխանատվությամբ պատրաստվում ենք մեր ճանաչված կոմպոզիտորին նվիրված փառատոնին, ևս մեկ անգամ նրա անունը հնչեցնելուն ու նրա հիշատակը հավերժացնելուն: Արժանի մարդ է, հարգված է մեր երաժիշտների, ժողովրդի կողմից»,- ասաց Հ. Չեքիջյանը:

Խոսելով փառատոնի մասին՝ Երվանդ Երկանյանը կարևորեց այն, որ փառատոնին հնչում են ոչ միաին դասական ժամանակաշրջանի ներկայացուցիչների գործեր, այլ նաև ժամանակակից կոմպոզիտորների:

«Շատ գործերի առաջին կատարողն է Հայաստանի պետական սիմֆոնիկ նվագախումբը, այդպես ստեղծագործական հաջողություններ են արձանագրել այն կոմպոզիտորները, որոնք երբևէ կարող էին երազել իրենց գործերը կենդանության օրոք լսելու առումով: Բացի այդ՝ այդ փառատոների միջոցով մեր սիմֆոնիկ նվագախմբի կարկինն ավելի բացվում է, ընդգրկում է ավելի երիտասարդ հեղինակերի գործեր, ինչը չափազանց կարևոր է»,- ասաց Ե.Երկանյանը:

Փառատոնի կազմակերպիչն է Հայաստանի պետական սիմֆոնիկ նվագախումբը՝ ՀՀ կրթության‚ գիտության‚ մշակույթի և սպորտի նախարարության աջակցությամբ։ Փառատոնի գեղարվեստական ղեկավարն է դիրիժոր Սերգեյ Սմբատյանը։ Հայ կոմպոզիտորական արվեստի 11-րդ փառատոնի շրջանակներում անցկացվելիք երեք սիմֆոնիկ և մեկ կամերային համերգների ընթացքում կհնչեն ինչպես Ալեքսանդր Հարությունյանի‚ այնպես էլ ժամանակակից հայ կոմպոզիտորների ստեղծագործությունները։

Փետրվարի 8-ին՝ փառատոնի բացման երեկոյին, Հայաստանի պետական սիմֆոնիկ նվագախումբը և Հայաստանի ազգային ակադեմիական երգչախումբը Հովհաննես Չեքիջյանի ղեկավարությամբ կկատարեն Ալեքսանդր Հարությունյանի վոկալ-սիմֆոնիկ ստեղծագործությունները։ Հետագա համերգների ընթացքում կհնչեն Ալեքսանդր Հարությունյանի Շեփորի‚ Ջութակի և լարային նվագախմբի համար գրված կոնցերտները։ Ջութակի կոնցերտը կներկայացնի հայտնի ջութակահար Ռոման Սիմովիչը, իսկ Շեփորի կոնցերտը՝ Հայաստանի պետական սիմֆոնիկ նվագախմբի շեփորահար, միջազգային մրցույթի դափնեկիր Հայկ Գուրգենյանը։ Փառատոնը կեզրափակվի փետրվարի 25-ին։

Ասուլիսին ներկա Սերգեյ Սմբատյանն ասաց, որ թիմային աշխատանքի արդյունքում են որոշում, թե ում պետք է նվիրված լինի փառատոնը, ինչ ծրագիր կազմվի: «Մենք հնչեցնում ենք Ալեքսանդր Հարությունյանի երաժշտությունը, բայց նաև ունկնդրի համար կկատարենք մաեստրո Երկանյանի երաժշտությունը:  Մենք պետք է կարողանանք կարևոր մարդկանց երաժշտությունը հնչեցնելով՝ նաև ժամանակակից  տաղանդավոր մարդկանց երաժշտությունը ներկայացնել, ինչը մեզ շատ է մոտիվացնում»,- նշեց Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը: