Ձեր վստահելի աղբյուրը

«Բավրա»-ի մաքսակետի գործով ձերբակալված տեսուչի մասնակցությամբ առերեսում են իրականացրել՝ առանց պաշտպանների: Այս մասին «Փաստինֆո» -ի հետ զրույցում ասել է պաշտպան Վահան Հովհաննիսյանը:

Նրա խոսքով՝ իր պաշտպանյալն ուներ առողջական խնդիրներ, ինչի պատճառով հրաժարվել է առերեսման մասնակցելուց, սակայն դա ևս որևէ ազդեցություն չի ունեցել ու քննիչը շարունակել է կատարել քննչական գործողությունը` չնայած պաշտպանական իրավունքի բազմաթիվ խախտումներին:

«Հրավիրվել ենք քննիչի սենյակ՝ առերեսման: Տեսնելով, որ իրականացվում է մեր պաշտպանյալի առերեսումը մեկ այլ կասկածյալի հետ, մեր պաշտպանյալը հայտարարել է, որ հրաժարվում է հիշյալ քննչական գործողությանը մասնացելուց, քանի որ երկու գիշեր չի քնել,մի քանի դեղահաբ է ընդունել և չի ընկալում իրականացվող քննչական գործողության էությունն ու բովանդակությունը»,- ասել է պաշտպանը՝ նշելով, որ իր պաշտպանյալի այդ հայտարարությունից հետո քննիչն ասել է, որ կասկածյալն իրավունք չունի հրաժարվել քննչական գործողությանը մասնակցելուց, այլ՝ կարող է մասնակցել և ցուցմունք չտալ, ինչը պաշտպանի գնահատմամբ, ՀՀ քրեական դատավորության օրենսգրքի 63-րդ հոդվածի ակնհայտ և կոպտագույն խախտում է:

Հովհաննիսյանի խոսքով՝ պաշտպանի հրաժարվելուց հետո, երբ վերջինս վատառողջ վիճակում էր և չէր հասկանում, թե ինչ քննչական գործողություն է իրականացվում, քննիչը շարունակել է առերեսման կատարումը: Պաշտպանները հայտարարել են, որ իրականացվում է ակնհայտ ապօրինի գործողություն և չեն պատրաստվում մասնակցել այդ ապօրինի գործողությանը և դուրս են եկել քննիչի աշխատասենյակից, իսկ պաշտպանյալը հայտարարել է, որ առանց պաշտպանների հրաժարվում է մասնակցել քննչական գործողությանը:

«Մեր բացակայությամբ դուռը փակվել է մեր պաշտպանյալի վրա և քննչական գործողությունը շարունակվել է մինչև վերջ: Այսինքն՝ մեր բացակայությամբ և իր հրաժարման պայմաններում անձին ենթարկել են հոգեբանական բռնության, դա իր մեջ նաև խոշտանգման տարրեր է պարունակում և հարկադրել են մասնակցել այն քննչական գործողությանը, որին ինքը չի ցանկացել մասնակցել»,- ասել է պաշտպանը՝ հավելելով, որ այս գործողությունները կապում է վարչապետի հայտարարության հետ, որը կանխորոշել է այս գործողությունները:

«Երեկ վարչապետը Կառավարության նիստից առաջ հայտարարեց, որ մաքսակետում բռնվել են մի խումբ աշխատակիցներ՝ խոշոր մաքսանենգության դեպքով: Անմեղության կանխավարկածի խախտումն արդեն խրոնիկ բնույթ է կրում: Ես դա գնահատում եմ որպես ազդակ իրավապահ մարմիններին՝ յուրաքանչյուր գնով այս անձանց կատարած առերևույթ հանցագործությունը որակել որպես հանցագործողություն: Այսպես ասած՝ իրենց տվեց գրին քարտի հնարավորություն՝ իրականացնելու օրենքով նախատեսված և չնախատեսված բոլոր միջոցառումներն այս անձանց մեղադրանքները հիմնավորելու համար, քանի որ մինչև անձանց մեղադրանք առաջադրելը վարչապետն արդեն իսկ հայտնել է իր իրավական կարծիքն այն մասին, որ անձինք արդեն իսկ կատարել են հանցագործություն՝ մաքսանենգություն»,- ասել է պաշտպանը:

Հարցին, թե արդյո՞ք փոխվել է իր պաշտպանյալի դատավարական կարգավիճակը, պաշտպանն ասաց, որ այս պահին նրան մեղադրանք չեն առաջադրել և նա շարունակում է ունենալ կասկածյալի դատավարական կարգավիճակ:

«Բայց այն, ինչ մենք ենք տեսնում, կարծում եմ, որ սա իրավական բեսպրեդելի տիպիկ օրինակ է: Սա իրավական բեսպրեդել է: Այս պահին քննչական գործողությունները վերջացել են: Մեր բացակայությամբ ամբողջ ցուցմունքն արձանագրել են և ավարտել են քննչական գործողությունը»,- ասել է Հովհաննիսյանը:

Մանրամասները՝ սկզբնաղբյուր կայքում։