Ձեր վստահելի աղբյուրը

ԱՄՆ-ն միակողմանի ստվերային ակտիվ ջանքեր է գործադրում՝ խթանելու համար իսրայելապաղեստինյան հիմնախնդրի կարգավորմանը միտված Դոնալդ Թրամփի «Դարի գործարքի» իրականացման գործընթացը՝ չնայած դրա հետ կապված մի շարք կազմակերպությունների և առանցքային շահառու դերակատարների կողմից արտահայտված բացասական վերաբերմունքին։ Այս մասին գրել է արաբագետ Արմեն Պետրոսյանը։

«Վերոնշյալի համատեքստում, տեղեկատություն է տարածվել առ այն, որ առաջիկա շաբաթների ընթացքում Կահիրեում մի քանի կարևոր արաբական երկրների և Իսրայելի ղեկավարների մասնակցությամբ գագաթնաժողով է նախապատրաստվում՝ Վաշինգտոնի ակտիվ միջնորդությամբ։

Ի դեպ, նշված հանդիպումը բնութագրվում է որպես «աննախադեպ», քանի որ դրան կարող են մասնակցել Եգիպտոսի նախագահը, Սաուդյան Արաբիայի գահաժառանգ արքայազնը, Հորդանանի, ԱՄԷ-ի, Սուդանի, Բահրեյնի, Օմանի ղեկավարները, ԱՄՆ-ի պետքարտուղարը և այլն․․․ Նշվում է, որ փորձ է արվում ապահովել նաև Պաղեստինյան ինքնավարության ղեկավարի մասնակցությունը․ գործընթացը համակարգում է անմիջապես Մ․ Պոմպեոյի թիմը։

Եթե նման հանդիպում կայանա, ապա անգամ անկախ արդյունքներից, բավական կարևոր և , հիրավի, աննախադեպ քայլ կլինի մերձավորարևելյան հիմնախնդրի հետ կապված լիցքաթափման առումով»,- գրել է Արմեն Պետրոսանը։