Ձեր վստահելի աղբյուրը

Երևանի քաղաքապետ Հայկ Մարությանը գոհ է փողոցների երթևեկելի մասերի ձնամաքրման աշխատանքներից, սակայն դժգոհ մայթերի վիճակից: 

«Բնական պատճառները կան, որովհետև մեր համայնքային կազմակերպությունը նոր է ստեղծվել, չենք հասցրել համալրել տեխնիկան, որպեսզի մայթերը պատշաճ կերպով  մաքրված լինեն: Մյուս տարի շտկված կլինի վիճակը, այս տարի  նախապատրաստվում ենք այդ ամբողջ տեխնիկան գնել»,- ավագանու նիստի ընդմիջմանը լրագրողների հետ զրույցում ասաց Հայկ Մարությանը:

Նա նշեց, որ աշխատանքներ կատարված են նաև մայթերին, սակայն տեխնիկան բավարար չէ, չի հերքում  բոլոր հատվածների  համար:

Պատասխանելով քաղաքաշինության պետական կոմիտեի նախագահ Վահագն Վերմիշյանի կալանավորմանը և արդյո՞ք Երևանի գլխավոր ճարտարապետ Արթուր Մեսչանը հրավիրվել է այս գործի շրջանակում ԱԱԾ հարցաքննության, քանի որ, ըստ էության, քաղաքապետրանի թույլտվությամբ պետք է լինի շինարարական աշխատանքներ սկսելու համար, տիրապետո՞ւմ եք իրավիճակին, քաղաքապետը նախ ասաց, որ, իր տեղեկություններով, որևէ մեկը Երևանի քաղաքապետարանից ԱԱԾ չի հրավիրվել:

«Հարցը չեմ հասկանում… Ինչը տեղի է ունենում քաղաքապետարանի թույլտվությամբ, տեղի է ունենում քաղաքապետարանի թույլտվությամբ… Ասեմ, թե  ինչու չեմ հասկանում հարցը: Եթե առնչություն լիներ, կլիներ նույն գերատեսչությունը, եթե տարբեր գերատեսչություններ են, ապա ամեն մեկը տարբեր լիազորություններ ունեն, տարբեր գործառույթներ են իրականացնում, ամեն գերատեսչություն  պատասխան է  տալիս իր լիազորությունների սահմաններում»,- ասաց Հայկ Մարությանը:

Խոսելով մայրաքաղաքի տրանսպորտային ցանցի արդիականացման մասին՝ նա նշեց. «Մենք պատրաստվում ենք այս ամիս 100 միավոր ավտոբուսի տենդեր հայտարարենք: Աշխատում ենք նաև կառավարության հետ, որպեսզի այդ միջոցները  կառավարությունը տրամադրի, այսինքն թույլ տա, որ վարկային միջոցները գան:  Ամեն ինչ կանենք, որ աշնանը լինի Երևանում»:

Հարցին՝ ձեր կինը խառնվո՞ւմ է քաղաքապետի ձեր գործերին, ընտրո՞ւմ է պաշտոնյաների, ինչի մասին մամուլում հրապարակում եղավ, Հայկ Մարությանը պատասխանեց. «Ոչ մեկ Հայաստանում և օրենքով, և դե ֆակտո չի կարող խառնվել Երևանի քաղաքապետարանի գործերին նշանակումների հարցով: Բնականաբար, դրա մեջ մտնում են բոլորը: Իմ կինը, իմ ընկերները, անծանոթ մարդիկ առաջին օրվանից օգնում են,  որպեսզի կարողանանք մեր բոլոր խոստումներն իրականացնել: Եվ իմ ընկերները, և իմ կինը, և անծանոթ մարդիկ օգնում են այն հարցերով, ինչի շրջանակում կարող են օգնել»:

Կոնկրետ հարցին՝ ավագանու «Իմ քայլը» խմբակցությունում ձեր կնոջ հարցով նիստ եղե՞լ է, ինչի մասին կրկին մամուլը գրել էր, Երևանի քաղաքապետն ասաց. «Ես մեր նիստերի մասին ինֆորմացիա դուրս չեմ հանում: Կան փակ նիստեր, բաց, բացի մասին ինֆորմացիա տարածվում է:

Ասեմ նաև՝ իմ կինը և իր մի խումբ ընկերներ զրոյից  վտանգավոր թափոնների մասին ծրագիր են մշակել, օգնել են մեզ, որպեսզի 5,3 միլիորդ եվրոյի դրամաշնորհ լինի Երևանին: Դրա հետ կապ չուներ ոչ կառավարությունը, կապ չուներ քաղաքապետարանը, ուղղակի նրանք  իմ խնդրանքով գրել են այդ ծրագիրը, ներկայացրել են քաղաքապետարան: Մենք դիմել ենք... մեծ մրցույթում, որին մասնակցել են բազմաթիվ քաղաքներ, հաղթել ենք: Վերջերս ԵՄ դեսպանի հետ ստորագրեցինք հուշագիր, որ այս ծրագիրն անում ենք»:

Ինչ վերաբերում է ապրիլի 5-ին կայանալիք հանրաքվեին ընդառաջ «այո»-ի քարոզարշավին մասնակցելուն, Հայկ Մարությանն ասաց, որ այս պահին չգիտի՝ արձակուրդ կվերցնի, թե ոչ, բայց անպայման մասնակցելու է: Արձակուրդ չվերցմելու դեպքում, նրա խոսքով, աշխատանքային ժամերից դուրս կզբաղվի քարոզով: