Ձեր վստահելի աղբյուրը

«Երևանի Չեխովի անվան թիվ 55 դպրոցի 6/6 դասարանի աշակերտներին տնօրենը ստիպել է մինչև տարեվերջ հոգալ իրենց հարկի զուգարանի թղթի ու անձեռոցիկի պահանջը»,-Panorama.am-ին ահազանգում են աշակերտների ծնողները։

Ծնողներից մեկը նշում է, որ իրենք և դժգոհ են, և վախենում են ինչ-որ բան ասել։

«Ի՞նչ է նշանակում շաբաթական 2 տուփ զուգարանի թուղթ առնել, որի մի տուփն արժի 1000 դրամ։ Մի բան է, որ միայն դասարանի համար առնենք, այլ բան, որ ամբողջ հարկի աշակերտները պետք է օգտվեն։ Մենք դեմ չենք մեր երեխաների համար ինչ-որ բան առնել։ Ու մինչև տարեվերջ մեր ծնողկոմիտեի նախագահը պիտի տանի, էդ տուփերը հանձնի դասղեկին»,- բողոքեց մեր զրուցակիցը։

Նրա խոսքով, դասարանի դասղեկը արդարացնում է դպրոցի տնօրենի պահանջը՝ պատճառաբանելով, որ ամեն ինչ արվում է դպրոցի երեխաների համար, և այդ ամենից օգտվում են նաև իրենց երեխաները։

«Ամեն անգամ ինչ-որ հարցով մեզ խեղճացնում են։ Հիմա առաջարկել ենք, որ գոնե մյուս դասարաններն էլ գնեն, դասղեկն ասաց, որ կառաջարկի, նախնական 2 տուփ բերենք, հետո պարզ կլինի՝ ինչ անել»,- նշեց ծնողը։

Երևանի Չեխովի անվան թիվ 55 դպրոցի տնօրենի հետ կապ հաստատել չհաջողվեց. տեղում չէր։ Փոխտնօրեն Տաթևիկ Մելքոնյանը մեզ հետ զրույցում նշեց, որ վերստուգիչն արդեն դպրոցում է, իսկ ինքը բացատրագիր է ներկայացնում։

«Անձեռոցիկներ ենք ուզել երեխաներին համաճարակից պաշտպանելու համար։ Դա տեղադրվում է հատուկ տարայի մեջ, սանհանգույցում, իսկ երեխաները լվացվելուց հետո չորացում են իրենց ձեռքերը։ Դա եղել է ծնողխորհրդի առաջարկով և  ծնողխորհրդի արձանագրությամբ է այդ ամենը իրականացվել, օրենքի շրջանակում»,- նշեց Մելքոնյանը։

Ճշտող հարցին, դպրոցը չունի՞ միջոցներ և ինչո՞ւ պետք է մի դասարանը հոգա անձեռոցիկի խնդիրը, Մելքոնյանը պատասխանեց՝ մենք ունենք ժամանակացույց, կամավորության սկզբունքով տարբեր դասարանների ծնողներ բերել, մուտք են արել, տնտեվարն էլ վերցրել և գրանցումն արել է։ Դրա համար որևէ դրամահավաք չի կատարվել։

Այն, որ երեխաները չէ, որ պիտի հոգան դպրոցներում  զուգարանի թղթի, անձեռոցիկի, օճառի հոգսերն ու խնդիրները՝ ակնհայտ է, հարց է՝ ինչու նախարարությունը չի զբաղվում խնդրով. առաջին դեպքը չէ, որ ծնողները ահազանգում են՝ դպրոցների սանհանգույցներում ոչ օճառ կա, ոչ՝ զուգարանի թուղթ։

ԿԳՄՍ նախարարությունից մեզ հետ զրույցում ասացին, որ ավագ դպրոցները, աշակերտների թվով պայմանավորված, նախարարությունից ստանում են  որոշակի գումար։

«Այդ գումարներով նրանք պետք է նաև տնտեսական ապրանքներ ձեռք բերեն։ Բայց միայն ավագ դպրոցներն են գտնվում նախարարության հսկողության տակ, մյուս դեպքերով զբաղվում են մարզպետարաններն ու համայնքապետարանները»,- ասաց ԿԳՄՍ մամուլի խոսնակ Անժելա Կժդրյանը։

Հարցին՝ արդյո՞ք հետևողական է նախարարությունը, որ փոխանցված գումարը նպատակին ծառայի, Կժդրյանը պատասխանեց՝ նախարարության թեժ գիծը աշխատում է, և եթե բողոքներ են լինում, ապա իրենք գնում են դրանց հետքերով. «Բայց այս խնդրով թեժ գծին զանգերը շատ քիչ են լինում»։

Երևանի քաղաքապետարանից մեզ հետ զրույցում հայտնեցին, որ քաղաքապետարանի վերահսկողության վարչությունը երեկ երեկոյան ուսումնասիրություն է անցկացրել Երևանի Չեխովի անվան թիվ 55 դպրոցում, սակայն արդյունքների մասին խոսելը դեռևս վաղ է։

«Երեկ երեկոյան ուսումնասիրություն անցկացվել է։ Ահազանգ ստանալու դեպքում վերահսկող վարչությունը գնում է տվյալ դպրոց, և խախտումների դեպքում տնօրինությունը պատասխանատվության է ենթարկվում, մինչև անգամ քրեական պատասխանատվություն է նախատեսված»,- ասաց Երևանի քաղաքապետարանի մամուլի խոսնակ Հակոբ Կարապետյանը։

Մեր հարցին՝ քաղաքապետարանը գումար հատկացնո՞ւմ է դպրոցներին տնտեսական ծախսերը հոգալու համար, Կարապետյանը նշեց, որ պետական բյուջեից է գումար հատկացվում, այլ ոչ քաղաքային բյուջեից, սակայն հիմնական դպրոցներում վերահսկողություն իրականացնում է քաղաքապետարանը։

«Քաղաքապետարանի վերահսկող վարչությունը նախատեսված և չնախատեսված այցեր է իրականացնում դպրոցներ, որպեսզի հասկանա՝ պետության հատկացրած գումարը նպատակին ծառայում է, թե ոչ։ Սակայն ահազանգեր դեռևս  լինում են»,- ասաց Կարապետյանը։

Շատ դպրոցներում վերոնշյալ պահանջը երեխաների առջև ոչ էլ կդրվի. դպրոցներում ինչպես միշտ չի լինի ոչ օճառ, ոչ զուգարանի թուղթ։ Բայց արդյոք դա կլինի «ոչ խախտում»։

Սովորական հիգիենայի պայմանները ապահովելուն դպրոցները պատրաստ չեն, վիրուսոների դեմ պայքարելում ո՞նց  են պատրաստ. առողջապահության նախարարն էլ ասում է՝ մենք պատասրատ ենք կորոնավիրուսի դեմ պայքարին։