Ձեր վստահելի աղբյուրը

«Սահմանադրական փոփոխությունների հանրաքվեի հարցը չի կարող մեկ-երկու հոգու որոշելիքը լինել»,- այսօր խորհրդարանում լրագրողների հետ զրույցում ասաց ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը։

Պատգամավորը նշեց, որ ԲՀԿ-ն որոշել է հրավիրել քաղաքական խորհրդի նիստ, որտեղ սահմանադրական փոփոխությունների մասին կկարողանան արտահայտվել ոչ միան ԱԺ «Բարգավաճ Հայաստան» խմբակցության անդամները, այլ բոլոր ԲՀԿ-ական գործիչները. «Պետք է բոլորի կարծիքը լսել, ապա կայացնել որոշում, թե որ ճամբարում կլինի խմբակցությունը»։

Պետրոսյանն ասաց, որ ինքը դեմ է արտահայտվել սահամադրական փոփոխությունների նախագծին, քանի որ ինքը մասնագիտությամբ իրավաբան է, և իրավական առումով, սահմանադրական փոփոխությունների գործընթացը սկսվել և ընթանում է ՀՀ գործող օրենսդրության մի շարք խախտումներով։

Հարցին՝ եթե հանրաքվեի ընթացքում հասարակությունն այո ասի սահմանադրական փոփոխություններին, և ՍԴ դատավորները դիմեն ՄԻԵԴ, ի՞նչ շանսեր կունենան, Պետրոսյանը պատասխանեց՝ շանսերը մեծ են։

«ԵԽԽՎ-ի Հայաստանի հարցով 2 համազեկուցողները հենց նախագծի քննարկման պահին կոչ արեցին իշխանությանը՝ դադարեցնել հարցի քննարկումը և խնդիրն ուղարկել իրենց։ Ո՞նց կարող է այս ամենը անպատասխան մնա»,- ասաց Պետրոսյանը։

Պետորսյանը նշեց, որ այսօր դեռ պաշտոնապես քարոզարշավը չի մեկնարկել, բայց արդեն սկսվել է «այո»-ի քարոզը, ընդ որում, խոսքը միայն «այո»-ի կողմնակիցների մասին չէ. քարոզչություն են սկսել նաև «ոչ»-ի կողմնակիցները։

Հարցին՝ արդյո՞ք նորմալ կլինի, որ խորհրդարանական ընդդիմության կողմից «ոչ»-ի շտաբ չձևավորվի, Պետրոսյանը նշեց՝ «ոչ»-ի շտաբ չձևավորելը չի նշանակում, որ խմբակցությունն «այո»-ի կողմից է։
Դիտարկմանը, որ կասկածներ կան՝ «Բարգավաճ Հայաստան» խմբակցությունն  ու «Իմ Քայլը» քաղաքական առևտրի մեջ են մտել, և այդ է պատճառը, որ ԲՀԿ-ն հետ է կանգնել ՍԴ դիմելու որոշումից, Պետրոսյանն արձագանքեց՝ ամեն կարծիք իրականություն չէ.

«Ես կարող եմ շատերի մասին շատ բան ասել։ Ուրեմն՝ էդպիսի տեղեկություն չկա, չի եղել խմբակցությունների ղեկավարների միջև հանդիպում»։

Պետրոսյանը նշեց, որ հանրաքվե անցկացնելու համար 3.5 մլրդ ծախսելն այսօր շռայլություն է։

«Էնքան գերակա ուղղություններ կան՝ սահմանը համալրել անհրաժեշտ տեխնիկայով, աղետի գոտում բազմաթիվ անօթևան ըտանիքների արժանապատիվ կացարանով ապահովել, զոհված ազատամարտիկների ընտանիքներ կան, կիսանկուղային պայմաններում են ապրում։ Էս ուղղություններով  կարելի էր այդ գումարը ծախսել, ոչ թե անձից ազատելու համար։ Հրայր Թովմասյանն ի տրանսֆերով գերազանցել է բոլոր եվրոպական ամենահայտնի ֆուտբոլիստներին։ Եթե մեր երկրում տնտեսական հեղափոխությունը հաղթանակած լիներ, եթե մարդկանց կենսամակարդակը բարչր լիներ, ուրիշ ծախսելու տեղ չլիներ, էդ պարագան մեղմացուցիչ հանգամանք կլիներ էդքան ծախս անելը։ Բայց երբ բազմթիվ չլուծված սոցիալական խնդիրներ կան, տնտեսական հեղափոխությունը մնացել է օդից կախված ակնկալիք...»,- ասաց Պետրոսյանը։

Ըստ Պետրոսյանի, Հրայր Թովմասյանից զատ, իր խոսքով, անցյալի մնացուկներ այնքան կան, որ պատիվ չեն բերում Հայաստանի պետականաշինության գործին, նաև խայտառակում են Հայաստանն իրենց անունով և ներկայությամբ։

Վերջինս նշեց, որ նախքան իշխանության գալը, այս իշխանությունները նշում էին, որ պետք է վերջ դրվի սուպերվարչապետական համակարգին, սակայն այսօր իշխանությունները, կարծես, հարմարվել են այդ վիճակին. «Քանի դեռ իշխանություն չէին, իրենք անընդհատ թմբկահարում էին, որ սուպերվարչապետությանը վերջ պետք է դրվի, իսկ այժմ իրենցից որևէ մեկը չի ասում՝ եկեք էդ համակարգը փոխենք»։