Ձեր վստահելի աղբյուրը

«Ունենք իրականացված աշխատանքներ: Գետերի հուների մարքման նախագծա-նախահաշվային աշխատանքներ իրականացնելու համար նախարարություն արդեն մրցույթ է իրականացրել»,- Ազգային ժողովում կառավարության հետ հարցուպատասխանի ժամանակ ասաց շրջակա միջավայրի նախարար Էրիկ Գրիգորյանը՝ պատասխանելով հարցին, թե ի՞նչ ծրագիր ունի կառավարությունը Սևանա լիճ թափվող ջրերի մաքրությունն ապահովելու համար:

Նախարարի խոսքով,  հայտարարել են մրցույթ, ընտրվել է  կազմակերպություն, այս պահին իրականացնում է կեղտաջրերի կառավարման  միասնական մոտեցման հետ կապված նախնական գնահատում, հրավիրել են «Վեոլիա Ջուր» ընկերությանը, քննարկում են ունեցել:

Է. Գրիգորյանը հայտնեց, որ տարածքային կառավարման իրենց գործընկերների հետ քննարկել են նոր Կոտայք-Գեղարքունիք միավորված աղբավայրի ծրագրի իրականացման հետ կապված գործող աղբավայրի կոնսերվացման հետ կապված միջազգային դրամաշնորհային  ծրագրի իրականացումը, մի այլ ծրագրով աշխատանքներ են իրականացվում գետերի աէրացիոն պոտենցիալի բարձրացման հետ կապված: Նրա խոսքով, մաքրման  կայանների հետ կապված կազմակերպություններ կան, որոնք առաջարակներ են ներկայացրել:

«Երեք  քաղաքում  մեխանիկական մաքրման կայաններ կան տեղադրված, բայց կենսաբանական մաքրման  հաջորդ փուլի խնդիր կա: Բացի քաղաքային համայնքներից, այնտեղ բավական մեծ գյուղական համայնքներ կան: Այնտեղ նույնպես մաքրման խնդիրը կա:
Կեղտաջրերի  մաքրման  աշխատանքին զուգահեռ դիտարկվում է  ընդհանուր համալիր լուծման շրջանակը: Այդ աշխատանքը ներկայացվել է կառավարությանը, հանձնարարական է տրվել տարածքային կառավարման և ենթակառուցվածքների նախարարությանը, այդ աշխատանքները նույնպես իրականացվում են»,- ասաց նախարար Է.Գրիգորյանը: