Ձեր վստահելի աղբյուրը

«Էդգար, դու իմ վրա կեղծ ցուցմունք ես գրել, հիմա շատ կարևոր է… Դու բարոյականություն ունենաս՝ Գագիկ Մկրտչյանի կնոջը պատասխանի: Էդգար, պետք է քո սխալն ուղղես»,- Երևանի ընդհանուր իրավասության դատարանի Շենգավիթի նստվայրում ՊՊԾ գնդի գրավման գործով «Սասնա ծռերի» այսօրվա դատավարությանն ասաց ամբաստանյալ Արմեն Բիլյանը՝ դիմելով գործով մեղադրյալներից Էդգար Սողոմոնյանին, որի քրեական հետապնդումը  դադարեցվել է համաներման ակտի ընդունման հիմքով:

Նշենք, որ այսօրվա նիստում հարցաքննում էին գործով տուժող ոստիկան Գագիկ Մկրտչյանին բուժօգնություն ցուցաբերած հիվանդանոցի բուժաշխատողները։

«Դու կեղծ ցուցմունք ես տվել, 10 հազար դրամ են քեզ տվել ու նույն օրը տուն ես գնացել:  Իմ վրա գրել ես այն, այն ինչ քեզ ասել են: Դու տեսե՞լ ես, որ ես կրակել եմ, խփել»,-հարցով նրան դիմեց Բիլյանը:  

Էդգար Սողոմոնյանը հրաժարվեց պատասխանել ամբաստանյալների, նաև պաշտպանների հարցերին:

«Դուք գիտեք, որ վաղը, մյուս օրն ակնհայտ սուտ մատնության համար կկանչվեք պատասխանատվության: Այսինքն՝ այն գործարքը, որը տեղի է ունեցել ձեր և քննիչի միջև, այդ  գործարքը վաղ թե ուշ, միևնույնն է, չեղակվելու է, դուք կանգնելու եք պատասխանատվության առաջ: Դուք այդ մասին գիտե՞ք»,- հարցրեց պաշտպաններից Զարուհի Փոստանջյանը:

«Էդգար վախենո՞ւմ ես հարցերին պատասխանել»,- հարցրեց Բիլյանը:

Է. Սողոմոնյանն արձագանքեց. «Չեմ վախենում, չեմ պատասխանելու»: 

Տուժողների իրավահաջորդների և Զ.Փոստանջյանի միջև վիճաբանություն եղավ, նրանք տեղից բղավում էին: Դատավորը երեք անգամ նկատողություն հայտարարեց  Զարուհի Փոստանջյանին՝ դրսևորած վարքագծի և  դատարանի նկատմամբ անհարգալից վերաբերմունք դրսևորելու համար: Դատարանը նկատողություն հայտարարեց նաև տուժողի իրավահաջորդ Արփինե Թումասյանին:

«Հարգելի դատարան, կխնդրեմ կարգ ու կանոն հաստատել դատարանում»,- ասաց Փոստանջյանը՝ դիմելով դատավոր Մեսրոպ Մակյանին:

«Դուք կարգ ու կանոնի առաջին խախտողն եք»,- արձագանքեց դատավորը:

Այնուհետև դատավոր Մակյանը դիմելով Է. Սողոմոնյանին՝ ասաց, որ ամբաստանյալ Պավել Մանուկյանը մի քանի անգամ պնդել է՝ Գագիկ Մկրտչյանին հրազենային վիրավորում է հասցրել ոչ թե Արմեն Բիլյանը, այլ պատահական կրակոցով թևից հրազենային վիրավորում է հասցրել սույն գործով այլ ամբաստանյալ՝ Էդվարդ Գրիգորյանը:

«Ձեր նախքննության ժամանակ  տված ցուցմունքը պնդում եք՝ պատասխանեք այո կա ոչ, այսինքն՝ համապատասխանո՞ւմ է իրականությանը»,- հարցրեց դատավորը:

Է. Սողոմոնյանը կրկին ասաց, որ հրաժարվում է պատասխանել հարցին:

Հիշեցնենք, որ ՊՊԾ գնդի գրավման գործով «Սասնա Ծռեր» խմբի անդամներից կալանքի տակ շարունակում են մնալ ամբաստանյալներ Արմեն Բիլյանն ու Սմբատ Բարսեղյանը, որոնք մեղադրվում են նաև սպանության մեջ: Մյուսների նկատմամբ ընտրված խափանման միջոց կալանավորումը փոխվել է՝  պատգամավորների անձնական երաշխավորությամբ։ Պավել Մանուկյանն ազատ է արձակվել 1 միլիոն դրամ գրավի դիմաց։