Ձեր վստահելի աղբյուրը

«Այս  պահին չեմ կարող ասել խնդիրներ կան, թե ոչ,  որովհետև  այս պահին ուսումնասիրություն է  իրականացվում»,- կառավարությունում լրագրողների հետ ճեպազրույցում ասաց ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը՝ պատասխանելով հարցին, թե «Բիլայնի» և «Յուքոմի»  առքուվաճառքից ի՞նչ նորություն կա, արդյո՞ք  խնդիրներ կառաջանան երկու խոշոր կազմակերպությունների միավորումից, թե՞ ոչ:

Նա նշեց, որ օրեր առաջ է տեղի ունեցել ««Վեոն Արմենիա» և «Յուքոմ» փակ բաժնետիրական ընկերությունների դիմումի հիման վրա հարուցված վարչական վարույթում (համակենտրոնացման վերաբերյալ) առկա փաստական հանգամանքների մասին» հարցով առաջին նիստը, տեղակատվություն են հավաքագրում, որպեսզի  հասկանան, թե հնարավոր շուկաներում  ինչ է կատարվում: Իսկ շուկաներն են՝ ամրակցված կապ, ինտերնետ, շարժական ինտերետ, բջջային կապ,  ենթակառուցվածքներ, հեռուստատեսության վերահեռարձակման իրավունք:

«Բոլոր շուկաներում առանձին-առանձին նայելու ենք, ամբողջական պատկեր է  ներկայացվելու: Եթե տեսնենք, որ  կլինի շուկայի  խնդիր տնտեսական մրցակցության առումով, ապա մեր դատողությունները կլինեն այդ  տեսակետի, եթե տեսնենք, որ չկա խնդիր, կասենք՝ չկա: Հնարավոր է նաև պայմանով գործարք լինի, որ պետությունը որոշակի պայմաններ թելադրի կապված գործարքի հետ: Բայց այս պահին  որևէ վերջանական որոշում չկա, ամբողջական տվյալները դեռևս չունենք, վերլուծում ենք: Վելուծում ենք ընկերությունների  վերջին ֆինանսական հաշվետվությունները, բացասական կամ դրական բալանսով աշխատելու երևույթը և մի շարք  այլ հարցեր»,- ասաց Գ. Գևորգյանը:

Հարցին՝ կապի ոլորտում, մասնավորապես ֆիքսված, արդյո՞ք մենաշնորհ չի լինի, ՏՄՊՊՀ նախագահն ասաց, որ մենաշնորհ չի լինի, բայց գերիշխող դիրքի կենտրոնացավածությունը կմեծանա, այսինքն՝  գերիշխող  դիրքն ավելի կմեծանա:   Նրա խոսքով, նաև պետք է գնահատեն ֆիքսված կապի օգտվողների  քանակը, արդյո՞ք այդ ոլորտը շարունակում  մնալ տենդենցի մեջ, ի՞նչ ազդեցություն կունենա  շուկայի վրա:

Գերիշխող դիրքի կենտրոնացման դեպքում սակագնի  բարձրացում չի՞ լինի հարցին ի պատասխան Գ. Գևորգյանն ասաց, որ չի կարող ասել, բայց դա կարող է լինել պայմաններից մեկը. «Երկրներ կան, որտեղ համակենտրոնացումից  հետո եղել են գների բարձրացում,  երկրներ կան՝ եղել է իջեցում, տեղեր կան, որ պայման են սահմանել»:

Գ.Գևորգյանը պատասխանելով հարցին, թե խոսվում է այն մասին, որ հնարավոր է միացման դեպքում  երրորդ օպերատորի արդեն բջջային  ցանցում  ներգրավելու դժվարություններ առաջանան, այս մասով քննարկումներ նախատեսվա՞ծ են, ասաց. «Միանշանակ, այո:  Դա ևս մեկ լուրջ հանգամանք է, որ պետք է նայենք, և հնարավոր է պայմանները, եթե թույլատրվի գործարքը, վերաբերվի նաև դրան: Դա ևս մեր ուշադրության կենտրոնում է»:

Լրագրողները հետաքրքրվեցին, թե ինչո՞վ է պայմանավորված միավորումը, արդյո՞ք սեփականատերերը հիմնավորում են, ՏՄՄՊՀ նախագահը պատասխանեց. «Այո, հիմնավորում են: Իհարկե, լավ կլիներ իրենց հարցնեիք: Ես կասեմ միայն այն պաշտոնական տվյալները, որոնք մեզ են ներկայացրել:  Առաջին հերթին կապված է ծախսերի  կրճատման հետ, որովհետև երկու տնտեսավարող  սուբյեկտ պահելու համար ֆիքս ծախսերը նույնն են ու երկու անգամ շատ է լինելում: Իսկ հաշվի առնելով, որ իրենք անընդհատ կորցնում են հաճախորդ,  այսինքն՝ հաճախորդների քանակը տրանսֆորմացվում է  բջջային  զանգից դեպի ինտերնետ տիրութ, իսկ այստեղից  գումարի  հավաքագրումը շատ ավելի քիչ է, այդ պատճառով ցանկանում են  միավորել իրենց ուժերը՝ շուկային դիմակայելու համար: Դա իրենց վարկածն է»:

Հարցին՝  իշխանությունները հաշվի առնո՞ւմ են այն հանգամանքը, որ «Յուքոմի», որը պատրաստվում է  ձեռք բերել «Բիլյանը», բաժնետոմսերի մեծ մասը  պատկանում է  ՊԵԿ նախկին նախագահ Գագիկ Խաչատրյանին, ինչ որ անհանգստություն ունե՞ն, նա պատասխանեց. «Չգիտեմ՝ իշխանություններն  ինչ ունեն իրենց օրակարգում, մաս չենք կազմում գործադրի, մենք օրենքով ստեղծող ինքնավար մարմին ենք, գործում ենք անկախ: Մենք  չենք կարող ունենալ որևէ անհանգստություն որևէ ֆիզիկական  անձի կապված գործունեության կամ այլ չափանիշների հետ: Մենք պետք է պահենք մեր ինքնավարությունը, որոշում  կայացնենք զուտ տնտեսական մրցակցությունից ելնելով»: