Ձեր վստահելի աղբյուրը

«Եթե մենք ժողովրդի կամքը ֆետիշացնում ենք, այլասերված կերպ ենք ներկայացնում,  թե  իբր ամեն ինչ ժողովուրդն է որոշում,  ապա դա ժողովրդավարական, իրավական պետությանն անհարիր բան է, նաև ժողովրդին խաբելու միջոց է»,- «Պոլիտէկոնոմիա» հետազոտական ինստիտուտի նախաձեռնած «Սահմանադրական անվտանգություն․ մարտահրավերներ և լուծումներ» խորագրով քննարկման ժամանակ նման պնդում արեց փաստաբան Երվանդ Վարոսյանը։

Անդրադառնալով ապրիլի 5-ին նշանակված հանրաքվեին, նա ընդգծեց, եթե ինչ-որ մեկին թվում է, որ ժողովուրդն ինչ-որ բանի մեջ ընտրություն է կատարելու, ապա դա խաբկանք է ու ժողովրդի նկատմամբ անարգանք։

«Ժողովրդավարություն նշանակում է, որ ժողովուրդը մանդատ է տալիս իշխանության ճյուղերին, որպեսզի նրանք այս հարցերն իր փոխարեն լուծեն։ Ժողովուրդը չպետք է հավաքվի հրապարակում ու որոշի՝ ում են կանխում, ում՝ ոչ։ Մենք այսպես կգնանք ոչ թե միջնադար, այլ ստրկատիրական համակարգ»,-մտահոգություն հայտնեց նա։

Որպես իրավաբան՝ անդրադառնալով Սահմանդրության փոփոխությունների հիմնավորումներին, Վարոսյանն ընդգծեց, եթե խոսքը ՍԴ-ին չվստահելու մասին է, ապա այդ դեպքում իր համար անհասկանալի են չափանիշները։

«Օրինակ, ինչո՞ւ է այլ նախկին պաշտոնյաների նկատմամբ առկա այդ վստահությունը, օրինակ Վճռաբեկ դատարանին ինչո՞ւ են վստահում, չեն վստահում Սահմանդրական դատարանին։ Այդ ի՞նչ է տեղի ունեցել, որի մասին մենք տեղյակ չենք։ Հավատարմության երդո՞ւմ են ստացել»,-ասաց նա։

Փաստաբանը հորդորեց իր ելույթը չդիտարկել որպես Վճռաբեկ դատարանի դեմ ելույթ, նկատեց, եթե ցանկանան նույն ձևով բարեփոխել Վճռաբեկ դատարանը, ինչպես անում են Սահմանադրական դատարանի պարագայում, ապա իրենք կկարոտեն ներկա Վճռաբեկ դատարանը։

Ինչ վերաբերում է ՍԴ դատավորների պաշտանովարման անհավասարության վերաբերյալ հիմնավորմանը, փաստաբանը հարց հնչեցրեց, ինչո՞ւ այդ պարագայում  փոփոխություններով համահարթեցման չեն գնում։

«Թեև ես դա սխալ եմ համարում, բայց եթե անհավասարությունն է խնդիրը, ինչու բոլորի պաշտոնավարման ժամկետ չեն սահմանում 12 տարին»,-նկատեց բանախոսը՝ ընդգծելով, որ ամեն հաջորդ քաղաքական իշխանություն ձևավորելու է իր սրտի դատարանը։

Փաստաբանի որակմամբ, առաջարկվող փոփոխություններով դրվում է մի ական, որը պայթելու է 12 տարի հետո, դրանից հետո էլի 12 տարի անց այս առումով որևէ զարգացում չի լինի։

«Այս հակասահմանադրական մեթոդով  սահմանադրություն փոխելով կամ հակասահմանդրական ճանապարհով դատավորին տուն ուղարկելով բացառում ենք, որ սրա արդյունքում ձևավորվելիք ՍԴ-ն երբևէ անկախ է լինելու, որովհետև իրենց կողմից նշանակվելիք դատավորները շատ լավ պատկերացնում են, որ հակասահմանադրական ճանապարհով եկել են, և մի օր կարող են ոչ պակաս հակասահմանադրական ճանապարհով տուն գնալ։ Մենք անկախ դատարանի մասին խոսել չենք կարող»,-խնդիրը մանրամասնեց նա։

Փաստաբանը համոզմունք հայտնեց, ով այս գործընթացի վտանգավոր հետևանքները հասկանում է, լռելու իրավունք չունի։