Ձեր վստահելի աղբյուրը

Հայկական Արժեքների Պաշտպանության «Կամք» հասարակական նախաձեռնությունը հանդես է եկել հայտարարությամբ՝ ազգային համերաշխության ու ապրիլի 5-ին նշանակված հանրաքվեն բոյկոտելու կոչերով։

«Նկատի ունենալով՝

Հայաստանի Հանրապետությունում ստեղծված ներքաղաքական անհանդուրժողության մթնոլորտը, ուժերի պառակտվածությունն ու հասարակության հաշտության երկխոսության բացակայությունը,

2018 թվականի հեղափոխությունից հետո Հայաստանում սկսված և արդեն սպառվող կոռուպցիայի դեմ պայքարի սահմանափակ արդյունքները,

Հայրենիք ներթափանցած գլոբալիստական ապազգային ալիքը և նրանցից սնվող բախտախնդիր անհատների շարունակական սպառնալիքն ընդդեմ մեր ազգային արժեքների, արդեն թույլատրելիության սահմաններն անցնող քաղաքական հալածանքները, որոնք ծառայում են ոչ թե հեղափոխություն իրականացրած մեծամասնության, այլ՝ գլոբալիստների տնտեսական շահերին:

Նկատի ունենալով սփյուռքում համահայկական ծրագրերի՝ հայապահպանության, հայկական դատի պահանջատիրության և ազգային արժեքների պահպանության հետզհետե թուլացող ներուժը,

Տարածաշրջանում ստեղծված աշխարհաքաղաքական բարդ և վտանգավոր իրավիճակը, նամանավանդ Իրանի շուրջ տեղի ունեցող զարգացումներն ու թուրք-ադրբեջանական շարունակվող ու ահագնացող արկածախնդիր նկրտումները տարածաշրջանի բոլոր ժողովուրդների և մասնավորապես Վրաստանի, Արցախի, Նախիջևանի և նույնիսկ սփյուռքահայ զանգվածների նկատմամբ,

Եվ վերջապես, նկատի ունենալով ամբողջ աշխարհին տարեց տարի ավելի սպառնացող գլոբալ տաքացման վտանգը, որի հետևանքները Հայաստանում զգացվում են բարձր ջերմաստիճանի, հրդեհների և համաղետային այլ նշաններով,

Հայկական արժեքների պաշտպանության «Կամք» հասարակական նախաձեռնությունը կոչ է անում համահայկական հաշտության, համահայկական երկխոսության և վերազգային նպատակների շուրջ կոնսենսուսի ձևավորման:

Ստեղծված իրավիճակում պահանջում ենք՝

1. Մասսայականորեն բոյկոտել 2020 թվականի ապրիլի 5-ի հակաժողովրդավարական և պառակտիչ հանրաքվեն,
2. Ազգային օրակարգից ընդմիշտ հանել Ստամբուլյան կոնվենցիայի, հայերեն լեզվի դասավանդման սահմանափակման և նման անհեռանկար ու պառակտող երևույթների քննարկումները,
3. Համատեղ ուժերով ձևավորել համահայկական ազգային կոնսենսուսային տասնամյա ծրագիր,
4. Նիկոլ Փաշինյանի վարչակազմից՝ հեղափոխության նպատակների վերագործադրման նպատակով առողջ ուժերի հետ անհապաղ սկսել երկխոսություն:
Հայկական արժեքների պաշտպանության «Կամք» հասարակական նախաձեռնությունը քաղաքական բոլոր շրջանակներին հրավիրում է վերոնշյալ չորս նպատակների շուրջ համագործակցության:

Յուրաքանչյուր քաղաքական ուժ, կուսակցություն, հասարակական կազմակերպություն թե անհատ պարտավոր է այսուհետև իր հստակ կեցվածքն ունենալու Հայաստանի Հանրապետությանն ու հայությանը սպառնացող՝ վերևում ներկայացված երևույթների նկատմամբ: Ծածուկ գործողությունների, չարաշահումների և մանիպուլյացիաների ժամանակն անցել է, ժամանակն է հեղափոխության իրական նպատակների շուրջ ձևավորելու հայության համախմբման համահայկական դաշինք»,-ասված է հայտարարության մեջ։