Ձեր վստահելի աղբյուրը

«Կարծում եմ՝ այսօր ականատես ենք լինում այն երևույթին, ինչը կոչվում է նոր Հայաստան, այսինքն՝ Հայաստանի իշխանությունները սկսել են կառուցել իրենց պատկերացրած  նոր Հայաստանը»,- ՀՔԾ-ի մոտ՝ «Քաղաքացիական գիտակցություն» ՀԿ նախագահ Նարեկ Սամսոնյանին սպասելու ընթացքում լրագրողների հետ ճեպազրույցում ասաց քաղաքագետ Հրանտ Մելիք-Շահնազարյանը:

Նրա խոսքով, նոր Հայաստանը ենթադրում է քաղաքական այլակարծության, այլախոհության, ընդհանրապես քննադատական ցանկացած ձայնի տոտալ լռեցում, փակում, վերահսկում բոլոր այն պրոցեսների, որոնք կարող են լինել երկրի ներսում: 

«Այն փաստը, որ իրավապահ մարմինները, ըստ էության,  բացահայտ խոստանում են հետապնդում սկսել ակտիվիստների և քաղաքական ընդդիմադիր գործունեություն ծավալող գործիչների դեմ, հետո գնում են այդ քայլերին, վկայում է  միայն նրա մասին, որ իշխանությունների մտածելակերպում  կա ամենաթողության  ընկալում, իրենք վստահ են, որ իրենց թույլատրված է ամեն ինչ: Դրանից ելնելով, ըստ էության, սկսվում է  հետապնդում»,- ասաց քաղաքագետը:

Հ.Մելիք-Շահնազարյանը նշեց, որ սա քաղաքական հետապնդումների առաջին փուլն է, որովհետև առաջին անգամ է, որ սուտ մատնության հոդվածով մարդուն մեղադրանք է առաջադրում և այն մարդուն, ով, ըստ էության, իշխանության ամենասուր քննադատներից մեկն է:

«Քաղաքական  հետապնդումների սկիզբը տրված է, մենք նաև տեսնում ենք, որ կան մեր հասարակության մեջ գործիչներ, որոնք հստակ թիրախավորված են»,- ընդգծեց քաղաքագետը:

Նա նշեց, որ սա հարձակում է նաև ազատ խոսքի, ինֆորմացիայի ազատ ստացման, դրա տարածման դեմ:

«Սա նախազգուցում է  լրատվամիջոցներին, որ հրապարակելով ինֆորմացիա, որը  կարող է դուր չգալ Նիկոլ Փաշինյանին կամ  նրա քաղաքական թիմի ցանկացած անձի, լինելու են  հետապանդում, մեղադրանքներ,  կալանավորումներ: Դրան դիմադրելու միակ և գործուն ճանապարհը դրա դեմ հանդես գալն է»,- ասաց Հ. Մելիք-Շահնազարյանը: