Ձեր վստահելի աղբյուրը

Այսօր ապրիլյան պատերազմի հերոս, կրտսեր սերժանտ Վլադիմիր Նարինյանի ծննդյան օրն է։ Նա կդառնար 24 տարեկան։ Վլադիմիրը զոհվել է Մատաղիսի պաշտպանական դիրքերից մեկը պաշտպանելիս։

Վլադիմիրը ծնունդով Արմավիրի մարզի Մեծամոր քաղաքից էր, սակայն ընտանիքը հետագայում տեղափոխվել էր Արցախ՝ Մարտունի քաղաք, մշտական բնակության համար։ 2003-2013թթ. սովորել և ավարտել է տեղի դպրոցներից մեկը, ընդունվել Արցախի Պետական համալսարանի պատմության ֆակուլտետը։ 2014թ.ուսումը կիսատ թողնելով՝ անցել է պարտադիր զինվորական ծառայության Մատաղիսի N զորամասում, որպես կրտսեր սերժանտ։ Ծառայության ընթացքում Վլադիմիրը մշտապես աչքի է ընկել իր մասնագիտական բարձր պատրաստվածությամբ, նվիրվածությամբ ու զգոնությամբ։

Վլադիմիրը 2016թ-ի ապրիլի 4-ին մարտական դիրքի մատույցներում ընթացող մարտերի ժամանակ ցուցաբերելով խիզախություն` ոչնչացրել է թշնամու մեծաթիվ զինծառայողների, կասեցրել հակառակորդի առաջխաղացումը դեպի պաշտպանության խորքը: Հետմահու պարգևատրվել է Հայաստանի Հանրապետության «Արիություն» մեդալով:

2015 թ-ին հոկտեմբերի 19-ին amda.am-ում հրապարակված  «Ողջ-առողջ իջնեք դիրքերից» հոդվածի լրագրողն այցելելով մարտական հենակետերից մեկը խոսել է դիրքի ավագ, կրտսեր սերժանտ Վլադիմիր Նարինյանի հետ:

Մեջբերում ենք այդ հոդվածից մեկ հատված.
«-Ո՞րն է քեզ համար հայ ժողովրդի պատմության ամենափառավոր էջը, ո՞վ է քո հերոսը:
-Արցախյան հերոսամարտը, Մոնթե Մելքոնյանը…
-Ո՞ր էջը կցանկանայիր ջնջել մեր պատմությունից:
-Մոնթեի մահը… Ես կուզեի, որ նա ողջ լիներ,- ասաց Վլադիմիրը ու նայելով Մոնթե Մելքոնյանի նկարին՝ ասաց,- իմ հերոսը նա է…
-Դուք էլ մեր հերոսներն եք… Մոնթեն ասում էր՝ իմ կենացը մի խմեք, իմ գործը շարունակեք, իսկ դուք այսօր շարունակում եք նրա գործը, շարունակում եք պաշտպանել Արցախը, շարունակում եք սանձել ու հաղթել հակառակորդին…
-Մոնթեն մեծ հրամանատար էր, մեծ առաջնորդ, մեծ մարդ, իսկ մենք շարքային զինվորներ ենք:Մենք մեր պարտքն ենք կատարում… ընդամենը,- ժպտալով ասաց դիրքի ավագ Վլադիմիր Նարինյանը»: