Ռուբեն Մելիքյան. Հանրաքվեն կարող է ավելի վատ հետևանքներ ունենալ պետականության համար, եթե չձևավորվի «ոչ»-ի քարոզչության կողմ
«Լեգիտիմությունն ընդհանրապես ոչ թե իրավական, այլ քաղաքական կատեգորիա է։ Մեր նախաձեռնող խումբը բացառապես իրավաբաններից է կազմված, շեշտեմ պետական համակարգից դուրս գործող իրավաբաններ»,-անհրաժեշտ փաստաթղերը ԿԸՀ ներկայացնելուց առաջ լրագրողների հետ զրույցում ասաց իրավաբան, «Ոչ»-ի հանրային պաշտպանությունը ստանձնած նախաձեռնող խմբի հիմնադիր անդամ Ռուբեն Մելիքյանը։
Նրան ուղղված դիտարկումը վերաբերում էր այն բանին, որ ընդդիմությունը հրաժարվել է մասնակցել հանրաքվեի «ոչ»-ի արշավին՝ հիմնավորելով, թե կլեգիտիմացնի այդ գործընթացը։
Մելիքյանն ընդգծեց, իրենց երկընտրանքը ոչ թե լեգիտիմությունն ու ոչ լեգիտիմությունն են, այլ իրավաչափությունն ու ոչ իրավաչափությունը։
«Մենք շարունակում ենք պնդել, որ այս գործընթացը ոչ իրավաչափ է եղել։ Թե բովանդակային, թե ընթացակարգային առումով այս հանրաքվեի նշանակումը հակասահմանադրական է, և ի տարբերություն քաղաքական պրոցեսների, իրավաբանության մեջ անկախ ներգրավվածությունից, դրա ոչ իրավաչափ լինելը չի դադարում։ Մենք, չլինելով քաղաքական գործիչներ, չենք կարող լեգիտիմացնել, կամ ապալեգիտիմացնել որևէ բան»,-մանրամասնեց նախաձեռնող խմբի հիմնադիր անդամը։
Նա համոզմունք հայտնեց, այս գործընթացը կարող է ավելի վատ հետևանքներ ունենալ պետականության համար, եթե չձևավորվի «ոչ»-ի քարոզչության կողմ։
Մելիքյանը մեկ անգամ էլ մանրամասնեց, որ «ոչ»-ի քարոզչության կողմի ձևավորումը երկու նպատակ ունի՝
1) ՀՀ քաղաքացիներին հնարավորություն տալ հավասարության հիմունքներով հասու լինելու ինչպես «Այո», այնպես էլ «Այո»-ն բացառող մյուս տարբերակները հիմնավորող փաստարկներին։
2) ՀՀ քաղաքացիներին և միջազգային հանրությանը հնարավորություն տալ ունենալու վստահություն, որ քվեարկության արդյունքները եղել են վերահսկելի և բողոքարկելի։ Մենք վստահ ենք, որ մեր նախաձեռնությունը միտված է ի շահ Հայաստանի Հանրապետության: Մենք անելու ենք ամեն բան, որպեսզի հանրությունը խուսափի «ԱՅՈ» և «ՈՉ» կողմերի միջև սուր առճակատումներից: Մենք ջանքեր ենք գործադրելու, որ այս ընթացքում բացառվեն հանրությանը գույների բաժանելու և ատելություն քարոզելու արատավոր երևույթները:
Մելիքյանն ասաց, իրենք խոսելու են գործընթացի իրավական կողմի մասին, հետևելու են, որ ուղերձները զերծ լինեն ատելության խոսքից, պիտակավորումից, ակնկալում են նույնը հակառակ կողմից։
Լրահոս
Տեսանյութեր
Ուղեվարձերի գումարի ավելացման վերաբերյալ քաղաքապետարանի հրապարակած թվերը ծիծաղելի են ու ամոթալի. Բաբկեն Պիպոյան
