Ձեր վստահելի աղբյուրը

ՀԴՄ-ների քանակը գնալով անշեղորեն ավելանում է։ Լրագրողների հետ ճեպազրույցում ասաց ՊԵԿ նախագահ Դավիթ Անանյանը:

Նրա խոսքով, հանրության մի շատ մեծ զանգված կա, որ լսում է  հորդորները, իրավագիտակցության մակարդակը գնալով բարձրանում է, ինչին զուգահեռ ավելանում է ՀԴՄ-ների թիվը։

«Բոլոր պետություններում, հասարակություններում էլ կա մի այլ զանգված, անընդհատ փորձելու է այս կամ այն եղանակով հարկեր չվճարել, թաքցնել, ստվերում գործել։ Մեր գործառույթն է իրենց բացահայտելը, հորդորների տեսքով իրենց իրավագիտակցության բերելը կամ հարկ վճարելու մշակույթ ձևավորելը»,- ասաց ՊԵԿ  նախագահը։

Հարցին՝ չե՞ք պատրաստվում շահագրգռել քաղաքացիներին ՀԴՄ պահանջելու համար, Դ. Անանայանը պատասխանեց. «Չի կարելի շահագրգռել քաղաքացուն: Երբ դու շահագրգռում ես քաղաքացուն, ասում ես՝ ես գումար կվճարեմ ՀԴՄ վերցնելու համար, ոչ թե ձևավորում ես մշակույթ, այլ շահերի վրա հիմնված փոխհարաբերություն քո քաղաքացու հետ, որը մենք չենք ընդունում: Պետք է հորդորելով, համոզելով, խնդրելով, պարտադրելով գնանք առաջ»:

Ինչ վերաբերում է ստվերի կրճատմանը, նա նշեց, որ 2018 թվականի մայիսի համեմատ, օրինակ, հունվարի 27-ի դրությամբ ավելացված աշխատատեղերի քանակն ավելի քան 87 հազար է եղել, մի մասը ստվերից է բերվել, մի մասը նոր ստեղծված աշխատատեղեր են։