Ձեր վստահելի աղբյուրը

Այսօր՝ հայ մեծ գրող, բանաստեղծ Հովհաննես Թումանյանի ծննդյան օրը, Հայաստանում նշվում է որպես «Գիրք նվիրելու օր»։ Հայաստանում գիրք նվիրելու օրը Գրողների միության նախկին նախագահ Լևոն Անանյանի նախաձեռնությամբ և ՀՀ կառավարության որոշմամբ՝ նշվում է 2008 թվականից: Այսօր տոնն արդեն ժողովրդականություն է վայելում, ինչի վկայությունն է նաև արդեն մի քանի օր մարդկանցով լի գրախանութները։ 

Օրվան նվիրված կազմակերպվում են մի շարք միջոցառումներ։ ԿԳՄՍ նախարարության ենթակայության 12 գրադարաններում՝ Հայաստանի ազգային, Խնկո Ապոր անվան ազգային մանկական և մարզային գրադարաններում կիրականացվեն բազմաբովանդակ ծրագրեր և միջոցառումներ:
Կանցկացվեն գրքերի շնորհանդեսներ, հանդիպումներ, ցուցահանդես-տոնավաճառներ, գրքի նվիրատվության ակցիաներ, վիկտորինաներ, խաղ-մրցույթներ, հեքիաթապատումներ, ինտերակտիվ ընթերցումներ, քննարկումներ հեղինակների հետ, կինո և մուլտֆիլմերի դիտումներ, գրական և երաժշտական հոբելյարներին նվիրված քննարկում-տեսությունների և ունկնդրումների շարքեր:

Ժամը 16:00-ին, Հովհաննես Թումանյանի ծննդյան օրը և Գիրք նվիրելու տոնի առթիվ Հայաստանի ազգային պատկերասրահում տեղի կունենա «Թումանյան-Կոմիտաս-150» գեղարվեստական ալբոմի շնորհանդես։ Հեղինակ-կազմող՝ ՀԱՊ Գեղանկարի բաժնի պատասխանատու Հայկուշ Սահակյան։

«Գիրք կարդալը ծով մտնելու նման է, պիտի գլուխդ պտտվի ծովի անսահմանությունից, պիտի հանկարծ քո մեջ շոշափես հավերժության ներկայությունը, պիտի հանձնվես տարերքին»,- ասել է արձակագիր, հրապարակախոս Վարդգես Պետրոսյանը։