Ձեր վստահելի աղբյուրը

Դատարանը քննում է «5-րդ ալիք» հեռուստաընկերության սեփականատեր    Արմեն Թավադյանի կալանքի ժամկետը երկարաձգելու միջնորդությունը: Փաստաբան Արամ Օրբելյանը տեղեկացրեց, որ  մեկ ժամից որոշումը հայտնի կլինի:

«Եզրակացնել դատական գործընթացի մասին անհնար է, բերվել են բոլոր  արգումենտները: Դրանք մեկը չեն, երկուսը չեն:Հուսանք որ դատարանը չնայած այն ամենի, որ տվյալ դատարանի նկատմամբ կա փաստաբանական համայնքում  ձևավորված կարծիք, զերծ կգտնվի կախվածությունից:  Թեև  զուտ այն փաստը, կալանքի միջնորդություն է բերվել գործադիրի կողմից, արդեն ընդունելի չէ: Մեկ ժամ է մնացել, ամեն ինչ պարզ կլինի»,-ասաց փաստաբանը:

Արամ Օրբելյանը նշեց , որ խափանման միջոցի քննությունն ավարտվեց, իսկ որոշումը կհրապարակվի այսօր՝ 19:30:

«Ըստ էության որևէ նոր բան չի ներկայացվել. մի քանի նոր  փաստաթղթեր են ներկայացվել, որի շրջանակում ցույց տվեցինք մեր որոշումը»,- ասաց նա:

Արամ Օրբելյանը նաև անդրադարձավ կալանքի պատճառներին, նշելով, որ դա կապված է Թավադյանի գործունեության հետ:

«Գտնում ենք, որ բացակայնում են բոլոր հիմքերը, չկա հիմնավոր կասկած, չկա թաքնվելու կամ խոչընդոտելու որևէ ռիսկ: Կարծում ենք, որ սա կապված է պարոն Թավադյանի մեդիագործունեության հետ, այսինքն ՝ խոսքի ազատության լռեցնելու փորձ է, հաշվի առնելով, որ «5-րդ ալիք»-ը նոր է ձեռք բերվել, դեռևս ներդրումների փուլում է: Հիմա սառեցված են անձնական հաշիվները, հնարավորություն չկա հավելյալ ներդրումներ կատարելու, փորձ է կատարվում ուղղակի «5-րդ ալիք»-ի հնարավորությունները խոչընդոտել: Սա նաև կապված է նրա քաղաքական-հասարակական գործունեության հետ»,-ասաց փաստաբանը: