Ձեր վստահելի աղբյուրը

Արաբկիր համայնքի նախկին ղեկավար Հովհաննես Շահինյանը հրաժարվել է պատասխանել քննիչի հարցերին, քանի որ հարցերը իր հետ որևէ առնչություն չեն ունեցել։ Այս մասին   ՔԿ շենքից դուրս գալուց հետո  լրագրողների հետ զրույցում ասել է  Շահինյանը:

«Ինձ չի առնչվում և ես հրաժարվել եմ ցուցմունք տալուց: Ինձ ներկայացվեց հրավերի պատճառը, ինչը բոլորովին ինձ հետ չի առնչվում»,- ասաց նա`  միաժամանակ ավելացնելով, որ խոստացել է  պատճառների մասին չհայտարարել, թե ինչ գործի շրջանակում է հարցաքննվել: 

Ինչ վերաբերում է խուզարկության որոշմանն, ապա նրա կարծիքով՝ իր բնակարանի խուզարկությունն այս գործի շրջանակներում է եղել:

«Պատրաստվում ենք դիմել դատարան՝ բողոքարկելու այդ խուզարկության որոշումը»,-ավելացրեց նա:

Իսկ թե ինչու է երկար տևել հարցաքննությունը, նա ասաց, որ ինքն ու իր փաստաբանը ծանոթանում էին նյութերին. «Երբ ավարտեցինք, քննիչը հարցրեց՝ ուզո՞ւմ ենք պատասխանել իր կողմից առաջադրվող հարցերին, պատասխանել ենք՝ ոչ»,- ասաց նա:

Արաբկիր համայնքի նախկին ղեկավարը կարծում է, որ իրեն զրպարտել են. «Անհասկանալի և անհայտ մեկը ասել է, որ ինձ ինչ-որ գումար է տվել: Գոնե ծանոթ մարդ լիներ, եկել, զրպարտել է: Թավադյան Արմենին էլ չզրպարտեցին, վառ օրինակ է, երկու ամսվա պատմություն է: Զրպարտել են, որ ինքը ինչ-որ հանձնարարական է տվել, ես հավատացած եմ, որ նման բան չի եղել: Այնտեղ գոնե գիտենք ով է, այստեղ դա էլ չգիտենք»: