Թաթուլ Մանասերյան. Կառաջարկեմ մի բանաձև, որը կօգնի զարգացնել հատկապես արտահանումը
«Եթե երկիրը նախահարձակ է, լուրջ է վերաբերում իր պարտականություններին, ապա կարող է ճեղքում մտցնել կառույցում և ունենալ առաջընթաց»,- լրագրողների հետ հանդիպմանն ասաց տնտեսական գիտությունների դոկտոր, պրոֆեսոր, Թաթուլ Մանասերյանը՝ խոսելով «Հայաստանի տնտեսությունը ԵԱՏՄ-ում՝ մեր երկրի նախագահության տարում» թեմայով։
Նա հիշեցրեց, որ ԵԱՏՄ-ում հենց Հայաստանի նախաձեռնությամբ ընդունվեց թվային օրակարգը։
«Դա լուրջ քայլ էր բոլոր հինգ երկրների համար։ Եթե Հայաստանի Հանրապետությունում բարձր տեխնոլոգիաներն իսկապես մրցունակ են, ու մենք բավականին մեծ ծավալով արտահանում ենք, ապա ԵԱՏՄ անդամ մյուս պետություններում կա դրա դեֆիցիտը»,- նկատեց տնտեսագետը։
Նա հիշեցրեց, որ Հայաստանի կողմից քայլեր են արվել կենսաթոշակային միասնական համակարգի վերաբերյալ, ինչը թույլ կտա աշխատուժի ազատ շարժ, ու այդ ստաժը հաշվի կառնվի միության անդամ երկրներում։
Տնտեսագետն ասաց, որ Հայաստանի նախաձեռնությամբ առաջին քայլեր են արվել նաև ռոումինգի ծառայությունների՝ անվճար լինելու ուղղությամբ։
Մանասերյանի խոսքով, ԵԱՏՄ անդամ երկրները հաճախ են նշում, որ Հայաստանը կարողացավ ամենաշատը օգտվել ԵԱՏՄ անդամակցությունից, առավել ևս նախագահությունից։
«Նշեմ միայն, որ մասնավոր հատվածը շատ աշխույժ է այս ուղղությամբ։ Սրան հավելենք տնտեսական անվտանգության գծով ընդհանուր հնարավոր սպառնալիքների՝ օրինակ, պարենային, էներգետիկ անվտանգության դիմակայման փորձի փոխանակումը։ Օրինակ, Բելառուսը լուծել է պարենային անվտանգության խնդիրը, և արժե, որ մենք փորձի փոխանակում անենք»,- ասաց նա։
Մասնագետը նկատեց, Հայաստանում մրցունակ ապրանքները տնտեսական դիվանագիտության գործիքներով ու մեթոդներով պետք է ճիշտ մատուցվի ԵԱՏՄ անդամ երկրների շուկաներին։
«Սրան պետք է մեծ ուշադրություն դարձնել։ Եվ ես կառաջարկեմ մի բանաձև, որը կօգնի զարգացնել հատկապես արտահանումը։ Ներմուծել հնարավորինս մատչելի գներով հումք, նյութեր, զարկ տալ վերամշակող արդյունաբերությանը, և դա ուղղել դոլարի ու եվրոյի գոտի, որտեղ պահանջարկը մեծ է ու գնալով ավելանալու է։ Պետք է անենք ամեն ինչ, որ Հայաստանը վերագտնի իրեն։ Ուզում եմ հավաստել, որ մենք ունենք բոլոր հնարավորությունները 21-րդ դարում նոր ինդուստրիալ երկիր դառնալու համար»,- նշեց նա։
Հարակից հրապարակումներ`
Լրահոս
Տեսանյութեր
ՈՒՂԻՂ. Ազատ արձակել Բաքվում պահվող հայ գերիներին
