Ձեր վստահելի աղբյուրը

«Այսօր ՀՀ-ում կորոնավիրուս չկա»,- լրագրողների հետ զրույցում ասաց ՀՀ ԱՆ հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը։

Նրա խոսքով, թեև այժմ Հայաստանում կորոնավիրուսի դեպքեր չեն գրանցել, այնուամենայնիվ, հիվանդությունը խնդրահարույց է, և համաճարակաբանական ուսումնասիրություններ են իրականացվում. «Մենք խնդիր ունենք հարևան Իրանի հետ, որտեղ արձանագրվել են վարակման դեպքեր, և հատկապես, մեզ համար մտահոգիչ են մահերի դեպքերը։ Այս առումով մենք ամենօրյա աշխատանքներ ենք տանում ԱՀԿ-ի հետ, անընդհատ կապի մեջ ենք, և հնարավորություն ունենք իրավիճակը գնահատելու։ Նաև անընդհատ կապի մեջ ենք Ռուսաստանի և Վրաստանի հետ, որտեղից անընդհատ մարդկանց հոսքեր են նկատվում, և առողջապահության պատասխանատուների հետ մենք համագործակցում ենք։ Ինչպես նաև, մենք սահմաններում հսկողությունն ենք ուժեղացրել, ռիսկային երկրներից ժամանողները լրացնում են քարտեր, և 14 օր մեր հսկողության ներքո են գտնվում»։

Ինչ վերաբերում է բժշկական կազմակեպրություններին, ապա, ըստ Վանյանի, հայաստանյան բուժհաստատություններն ապահովվում են բոլոր անհրաժեշտ սարքավորումներով, որոնք պետք են հիվանդներին պատշաճ բուժօգնություն տրամադրելու համար։

Կարողությունները գնահատված են, համապատասխան բացերը լրացնելու համար կա նախարարության կողմից որոշում։ Նրա խոսքով, Հայաստանի բոլոր մարզերում ինֆեկցիոն առնվազն մեկ բաժանմունք պետք է ունենա բոլոր հնարավորությունները՝ հիվանդների սպասարկելու, եթե համաճարակ բռնկվի։ Այդ դեպքում մի հիվանդանոցը կառանձնացվի և կհարմարեցվի հիվանդության կանխարգելմանը։

Դիտարկմանը, որ թեև դեռևս կորոնավիրուսը Հայաստանում տարածված չէ, այնուամենայնիվ դեղատներում դիմակներ չկան, իսկ մարդիկ ցանկանում են կրել դրանք՝ հավանական վարակներից խուսափելու համար, Վանյանը պատասխանեց՝ պետք չէ դիմակ օգտագործել, ավելի ճիշտ է անձնական հիգենան պահպանել։

«Դիմակների խնդիր բոլոր երկրներում էլ կան, քանի որ սեզոնային գրիպի դեպքեր ևս շատ են գրանցվել։ Խորհուրդ է տրվում, որ բոլորը իրազեկ լինեն՝ սերտ շփման դեպքում է վիրուսը տարածվում։ Եթե ունեք հիվանդ, կրեք դիմակ, իսկ մենք հիմա հիվանդ չունենք»։

Դիտարկմանը՝ իսկ ինչի մասին են վկայում դպրոցներում արձանագրվող բացակայությունները, կամ այն, որ երեխաները կիսաառողջանալ հաճախում են դասերի, Վանյանը արձագանքեց՝ մենք այսօր չունենք համաճարակ, սուր շնչառական հիվանդություններն էլ նվազել են։

Panorama.am-ի ճշտող հարցին, թե ինչպես պահել անձնական հիգենան, եթե դպրոցներում նվազագույն պայմաններ ապահովված չեն, Վանյանը պատասխանեց՝ առողջապահության նախարարությունը տրամարդում է նորմեր՝ ինչ պայմաններ են անհրաժեշտ դպրոցներում, ինչպես պետք է պահպանվի երեխայի հիգենան, սակայն նորմերի պահպանման համաև հսկողություն պետք է իրականացնի կամ ԿԳՄՍ նախարարությունը, կամ մարզպետարանը։

Այսինքն՝ դպրոցահասակ երեխաների դեպքում խնդիրը կրկնակի է դառնում՝ մի կողմից չկա անձնական հիգենան պահպանելու համար նվազագույն պայման, մյուս կողմից՝ բժշկական դիմակի դեֆիցիտ է։

Վանյանը նաև ասաց, որ նախարարությունն ունի 160 հազար դիմակ, և պատրաստվում է լրացուցիչ դիմակներ ձեռք բերել։ Իսկ թե ինչպես է նախարարությունը բաշխելու այդ դիմակները, որևէ հստակ պատասխան չստացվեց։

Նշվեց նաև, որ Հայաստանում հոսպիտալացվել է 83 քաղաքացի, որ ունեցել են կորոնավիրուսի թեթև ախտանշաններ։ Բոլորն էլ տեստավորվել են, և արդյունքները բացասական են եղել։

Դիտարկմանը, որ դեղատան աշխատակիցները նշում են՝ հայաստանյան դեղատներից մեքենաներով արտահանում են բժշկական դիմակներ, Վանյանը նշեց ՏՄՊՊՀ-ն զգուշացրել է, որ կտուգանի այն տնտեսվարողին, ով անբարեխղճորեն դիմակների գները կբարձրացնի։ Իսկ արտահանման դեպքերի մասին Վանյանը չխոսեց, պարզապես ասաց՝ գնային բարձրացումը պայմանավորվում է նաև արտահանմամբ։

Հիշեցնենք, որ ավելի վաղ Panorama.am-ը տեղեկացրել էր, որ Հայաստանում բժշկական դիմակներ չկան, առաջիկայում չեն էլ լինելու։