Ձեր վստահելի աղբյուրը

Երևան քաղաքի ընդհանուր իրավասության դատարանում դատավոր Հարություն Մանուկյանի նախագահությամբ շարունակվեց  նախկին փոխոստիկանապետ Լևոն Երանոսյանի գործի քննությունը։ Նիստում իրականացվեց տեսաժապավենների ուսումնասիրություն։Դատական նիստին ներկա է տուժող ԱԺ փոխնախագահ Ալեն Սիմոնյանը։

«Ամբողջ հեղափոխության ժամանահատվածում տարվել է այն քաղաքականությունը  և եղել է այն տրամաբանությունը, որ բռնություն ընդհանրապես չի կիրառվելու, որևէ մեկն, ով կկիրառի բռնություն,  սադրիչ է, նույն րոպեին ժողովորդի  միջից դուրս կհանվի: Չեմ բացառում, որ այդ ժամանակ եղել են նաև կազմակերպված սադրիչների խմբեր»,- դատարանում հայտարարեց Ալեն Սիմոնյանը:

Նրա խոսքով, եթե դուրս հանեն հնարավոր սադրիչների գործողությունները, Հայաստանի քաղաքացիների կողմից որևէ լարվածություն չի եղել, չէր կարող լինել ի սկզբանե: Ա. Սիմոնյանի խոսքով, ոստիկանների կողմից վահանակներին հարվածելը,  պայթյունները հոգեբական ճնշում էր առաջացնում.

«Շատ մարդիկ  գտնվելով այդտեղ, նաև ես, գտնվել ենք ոչ այնքան հավասարակշռված վիճակի մեջ:  Մեղադրել մարդկանց կամ ասել, որ այդ մարդիկ սադրիչ են  այն պարագայում, երբ անընդհատ, կոնկրետ նախատեսված միջոցներ էին կիրառում, կարծում եմ՝ առնվազն  անլուրջ է:Պետք չէր Բաղրամյան փողոցը մարտի դաշտ սարքել ու հետո զարմանալ, որ մարդկանց, ում վրա նռնակներ էին գցել, վիրավորվել էին, արյուն էին տեսնում, փորձում էին  ինչ որ դիմադրությունն  ցույց տալ և հիմա դա ներկայացել,  իբրև ոստիկանության հետ  բախում է եղել»:

Նա նշեց, որ հիվանդանոցում իր հետ եղել են բազմաթիվ ոստիկաններ, որոնք տուժել էին ոչ թե ցուցարարների  գործողություններից, այլ հատուկ միջոցներից: 

«Միջոցները կիրառվել են այնպես, որ մեկ է եղել՝ ոստիկան կտուժի, թե ցուցարար»,- ասաց Ա. Սիմոնյանը:

Լևոն Երանոսյանին մեղադրանք է առաջադրվել այն բանի համար, որ նա հատուկ միջոցների գործադրմամբ դիտավորությամբ կատարել է այնպիսի գործողություններ, որոնք ակնհայտորեն դուրս են եկել իր լիազորությունների շրջանակից և էական վնաս են պատճառել քաղաքացիների իրավունքներին ու օրինական շահերին, ինչպես նաև անզգուշությամբ առաջացրել են ծանր հետևանքներ։ Նրան մեղադրանք է առաջադրվել ՀՀ քրեական օրենսգրքի 309-րդ հոդվածի 2-րդ և 3-րդ մասերով:

Ըստ մեղադրանքի` Լևոն Երանոսյանը, հատուկ միջոցների գործադրման անհրաժեշտություն առաջացնող իրադրություններում գործելու ունակությունը որոշող ստուգումներ անցած չլինելով, չունենալով հատուկ որակավորում  և դրանով իսկ պայմանավորված` չունենալով լուսաձայնային հատուկ միջոցներ ստանալու և անձամբ գործադրելու լիազորություն, դրանց կիրառման համար թույլատրելի չափանիշների խախտմամբ, 2018 թվականի ապրիլի 16-ին և 22-ին՝ Երևան քաղաքում անցկացված բողոքի զանգվածային ակցիաների ժամանակ, ցուցարարների նկատմամբ գործադրել է ընդհանուր առմամբ 8 հատ  «Զարյա» տեսակի լուսաձայնային նռնակներ, ինչի հետևանքով 2 տասնյակից ավելի անձանց առողջությանը պատճառվել է տարբեր աստիճանի, այդ թվում` ծանր և միջին ծանրության վնաս:Լևոն Երանոսյանի նկատմամբ ընտրվել է ստորագրություն երկրից չհեռանալու մասին խափանման միջոց։