Ձեր վստահելի աղբյուրը

«Մենք հերթականությամբ ներկայացնելու ենք այս քրեական գործի քրեական գործ չլինելը, շինծու, փուչ լինելը»,- ՀՀ երրորդ նախագահ Սերժ Սարգսյանի գործով առաջին դատական նիստից հետո լրագրողների հետ զրույցում ասաց պաշտպան Ամրամ Մակինյանը:

Նա նշեց, որ ինքը խոստացել է հանրությանը ցույց տալ, թե այս քրեական գործն ինչպես է կառուցվել, ինչ կա քրեական գործում, ինչ աղաղակող փաստեր կան այն մասին, որ պարոն Սարգսյանի նկատմամբ իրականացվում է քրեական հետապնդում:

«Սա ուղղակի զավեշտ է, որ սա կարող է կոչվել քրեական գործ, կարող է դառնալ մեղադրանք, գալ  դատարան»,- ասաց պաշտպանը:

Հարցին՝ քաղաքական ենթատեքստ կա՞, նա պատասխանեց. «Ենթատեքստ չկա, ուղղակի  քաղաքական հետապնդում է: Դա ուղղված է պարոն Սարգսյանի քաղաքական գործունեությունն առնվազն զսպման ինչ-որ մեխանիզմ գտնելուն»:

Նա նշեց, որ պետք էր մանրամասն, բազմակողմանի, լրիվ քննություն իրականացնել, հավաքել ոչ միայն մեղադրող ապացույցներ, նաև  արդարացնող ապացույցներ, չխոչընդոտել  պաշտպանական կողմին, որը բազմաթիվ միջնորդություններ է արել այս կամ այն ապացույցները պետական մարմիններից ձեռք բերելու համար, հարցումներ է կատարել ՊԵԿ որոշակի հանգամանքներ պարզելու համար:

«Հարցումները վերաբերում էին վառելիքի քանակին, ինքնարժեքին, ձեռքբերմանը, իրացմանը: ՊԵԿ-ից մեզ պատասխանում են՝ ձեր հայցած տեղեկատվությունը առևտրային գաղտնիք է պարունակում: Տպավորություն է, որ այդ տեղեկությունները մենք պետք է տանենք ու մեր  գրասենյակներում օգտագործենք այն դեպքում, երբ մենք ՊԵԿ ուղղված նամակում կոնկրետ նշում ենք, թե այդ տեղեկություններն ինչ նպատակով են անհրաժեշտ, այսինքն՝ կոնկրետ քրեական գործով, կոնկրետ պաշտպանություն իրականացնելու համար»,- ասաց Ա. Մակինյանը:

Նրա խոսքով, ըստ վարույթ իրականացնող մարմնի,  Սերժ Սարգսյանը մեղադրվում է հանցագործության կազմակերպման մեջ. «Ինչ որ բան կազմակերպելը քրեաիրավական առումով շատ լուրջ գործողությունների շղթա է: Երբ որ գա  այդ փուլը, ես կընդգծեմ, բոլորդ կտեսնեք, թե մի քանի թերթ որպես մեղադրյալ ներգրավելու մասին որոշումը քանի բառ է պարունակում պարոն նախագահի գործողությունների մասին»:

Սերժ Սարգսյանի դեմ ցուցմունք տվող անձի վերաբերյալ հարցերին, մասնավորապես նշվում է գյուղատնտեսության նախկին նախարար Սերգո Կարապետյանի անունը, Ա.Մակինյանն ասաց, որ դեռ անուններ չի ուզում ասել:

«Ես պնդում եմ՝ նախկինում էլ, հիմա էլ, քրեական գործերի նյութերին ծանոթանալուց հետո ասել եմ, որ այդ ցուցմունքն էլ չկա: Միայն ցուցմունքի փաստացի, թղթի, գործի մեջ կարված լինելը դեռ չի նշանակում, որ դա կշիռ ունի: Պարոն նախագահը մեկ անգամ առերես հարցաքննվել է իր դեմ  վկայած անձի հետ»,- ասաց Սերժ Սարգսյանի պաշտպան Ամրամ Մակինյանը:

Սերժ Սարգսյանին մեղադրանք է առաջադրվել այն բանի համար, որ նա 2008թ․ ապրիլի 9-ից մինչև 2018թ․ ապրիլի 9-ը ընկած ժամանակահատվածում, զբաղեցնելով ՀՀ նախագահի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագործելով, 2013թ․ հունվարի 25-ից մինչև նույն թվականի փետրվարի 7-ն ընկած ժամանակահատվածում, կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակության կատարում։