Ձեր վստահելի աղբյուրը

«Չեմ կարող ասել գործի որ մասն է շինծու, որ մասը ոչ, բայց  այն մասով,  որ Սերժ Սարգսյանը ներգրավել են այս գործի մեջ, գտնում եմ, որ, այո, քաղաքական ենթատեքստ ունի»,-Երևանի ընդհանուր իրավասության դատարանի՝ Ավանի և Նոր Նորք նստավայրի  մոտ լրագրողների հետ զրույցում ասաց ԱԺ նախկին նախագահ Արա Բաբլոյանը:

Նա նշեց, որ շատ լավ է ճանաչում Սերժ Սարգսյանին, նա չէր կարող միջամտել, ցուցում տալ, որ այս կամ այն ընկերությունը շահի: Ա. Բաբլոյանի խոսքով, եթե կա թերություն նման մրցույթում, ապա նրանք, ովքեր պատասխանատու են մրցույթի անցկացման համար, նրանք էլ պետք է պատասխան տան։

Նշենք, որ այսօր Երևանի ընդհանուր իրավասության դատարանի՝ Ավանի և Նոր Նորք նստավայրում մեկնարկում է ՀՀ երրորդ նախագահ Սերժ Սարգսյանի դատավարությունը: Դատարանի դիմաց հավաքված են Սերժ Սարգսյանի աջակիցները, ՀՀԿ անդամները՝ իրենց  աջակցությունը հայտնելով ՀՀ երրորդ նախագահին։

ՀՀ երրորդ նախագահ Սերժ Սարգսյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով։
Ըստ նախաքննական մարմնի՝ զբաղեցնելով ՀՀ նախագահի պաշտոնը, նա իր պաշտոնեական դիրքն օգտագործելով, 2013 թվականին կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489.160.310 ՀՀ դրամի հափշտակության կատարումը: Երրորդ նախագահի նկատմամբ որպես խափանման միջոց է ընտրվել ստորագրություն՝ չհեռանալու մասին։