Ձեր վստահելի աղբյուրը

«ՀՀ և ԵՄ միջև կքնված համապարփակ և ընդլայնված գործընկերության համաձայնագիրը առանցքային դերակատարություն ունի ՀՀ-ԵՄ միջև հարաբերությունների զարգացման հարցում»,- խորհրդարանում «ՀՀ-ԵՄ Համապարփակ և ընդլայնված գործընկերության համաձայնագիր» խորագրով լսումների ժամանակ ասաց ՀՀ փոխվարչապետ Մհեր Գրիգորյանը:

Նա նշեց, որ կնքված համապարփակ և ընդլայնված գործընկերության համաձայնագիրը նոր թափ է հաղորդել ՀՀ-ԵՄ հարաբերություններին, ինչպես նաև տարբեր ոլորտների համար հիմք է հանդիսացել հետագա բարեփոխումներն ուրվագծելու համար։

«Համաձայնագրի կիրարկման գործընթացը պատշաճ կազմակերպելու համար իմ գլխավորությամբ ստեղծվել է միջգերատեսչական հանձնաժողով, որն իրականացնում է համաձայնագրի կիրարկման գործընթացի մշտադիտարկում: Հանձնաժողովը նախ քննարկեց և հավանության արժանացրեց այդ ճանապարհային քարտեզը, ապա կենտրոնացավ բուն գործընթացի վրա»,- ասաց նա:

Փոխվարչապետի ընդգծեց՝  ՀՀ-ԵՄ հարաբերությունների դրական զարգացում ունեն, ինչի մասին է վկայում նաև երկկողմ ձևաչափով տրամադրվող աջակցության ծավալների ավելացումը: Մասնավորապես, ըստ Գրիգորյանի,  Հայաստանին հաջողվել է ավարտել 2017 թվականի 34,5 մլն եվրոյի և 2018 թվականի 46 մլն եվրոյի գործընկերությունների ծրագրով նախատեսված աջակցության համաձայնագրերի հաստատման գործընթացները և մտնել իմպլեմենտացման փուլ:

«2019 թվականին գործողությունների ծրագրով նախատեսված աջակցության համաձայնագրերն արդեն իսկ հավանության են արժանացել և կստորագրվեն առաջիկայում, որոնցով աջակցության ծավալը զգալիորեն ավելացել է՝ հասնելով 65 մլն եվրոյի: 2020 թվականի գործողությունների ծրագրով նախատեսված աջակցության ուղղություններն արդեն իսկ նախանշվել և հստակեցվել են, որով նախատեսվող աջակցության ծավալը, հուսով եմ՝ կլինի ավելին, քան 2019 թվականի համար նախատեսված գումարի չափը»,- ասաց նա:

Բացի երկկողմ համագործակցության ձևաչափից, Գրիգորյանի խոսքով, ԵՄ հետ Հայաստանի համար համագործակցության հարթակ է նաև արևելյան համագործակցության գործիքակազմը, որի միջոցով ևս իրականացվում են մի շարք կարևոր ծրագրեր, ինչպես օրինակ՝ հարևանության ներդրումային հարթակի միջոցով իրականացվող էներգախնայման և վերականգնվող էներգետիկայի զարգացման, սահմանների արդիականացման և այլ ծրագրեր։
«ՀՀ-ԵՄ օրակարգում են նաև ռազմավարությունների արդիականացման և դրանց հիման վրա իրականացվող բարեփոխումների իրականացումը: 2020 թ. ծրագրով աջակցություն է նախատեսված արդարադատության և ոստիկանության ոլորտների ռազմավարական բարեփոխումների ուղղությունների համար, որոնք ընդգրկված են կառավարության գերակայությունների ցանկում»,- ասաց նա, ապա հավելեց՝ դեռևս նախորդ տարի ինտենսիվ աշխատաքներ են տարվել ոլորտային ռազմավարությունների և Հայաստանի վերափոխման ռազմավարության մշակման ուղղությամբ։ Դրանց մի մասն ընդունվել է նախորդ տարի, մի մասը՝ կլինի 2020 թվականի ընթացքում։ 

Նրա խոսքով՝ համաձայնագիրը Հայաստանի համար բարեփոխումների օրակարգ է, և դրա կիրարկումը կառավարության առաջնահերթություններից է: