Ձեր վստահելի աղբյուրը

«Դատարանի որոշմանը ծանոթանամ, նոր կարծիք կհայտնեմ դատական ակտի վերաբերյալ: Մենք մեր պնդմանն ենք մնում, որ դատախազը գործով անաչառ չէ, նախաքննությանն անաչառ չի մոտեցել»,- դատական ակտի հրապարակումից հետո լրագրողների հետ ճեպազրույցում ասաց ՀՀ երրորդ նախագահ Սերժ Սարգսյանի  պաշտպան Ամրամ Մակինյանը:

Նա նշեց, որ դատաքննությունը հրապարակային է, փուլ առ փուլ ցույց կտան, որ դատախազն այս գործով անաչառ չէ:

«Մենք դատախազի անձի հետ խնդիր չունենք, խնդիր ունենք դատախազի գործողությունների հետ, մենք բարձրացրեցինք այդ հարցերը»,- ասաց պաշտպանը: 

Հիշեցնենք, որ դատարանը մերժել է Սերժ Սարգսյանի պաշտպան Ռուբեն Հակոբյանի կողմից  մեղադրող  Արսեն Մարտիրոսյանին հայտնած բացարկի միջնորդությունը:

Ա.Մակինյանը չբացահայտեց պաշտնական թիմի հաջորդ քայլերը, նշեց, որ դատարանում անակնկալներ կլինեն:

Նա ասաց, որ գործից մի գաղտնիք կբացի. «Գործում չկան ապացույցներ,  գործում շատ լուրջ խնդիրներ կան: Խոսքը վերաբերում է  մասնավորապես կազմակերպության գործունեությանն ընդհանրապես այն մասով, որ  մասնակցելու գին է առաջարկել 420 դրամ այն դեպքում, երբ որ այդ  տարվա ընթացքում  100-ավոր տոննաներ  այդ կազմակերությունը ձեռք է բերել ավելի բարձր գներով՝ 440-450 դրամ: Ինչպե՞ս  կարող է 420 դրամով մատակարարվել Հայաստանի ամբողջ տարածքում:

Հարցում եմ կատարել Հայաստանի Վիճակագրական ծառայություն, հարցրել եմ՝ 2013 թվականին ի՞նչ արժեր դիզելային վառելիքը, մեծածախ, մանրածախ: Մեզ միայն մանրածախի գներն են տրամադրել՝ 465-467 դրամ, ըստ եռամսյակների:

Մեծածախն այս դեպքում բավականին բարձր  գին է ունենում այն տրամաբանությամբ, որ ոչ թե անձն է ստանում բենզալցակայանից, այլ տանում, հասցնում են տուն»:

Նա ընդգծեց, որ քրեական գործով անհրաժետ էին մասնագիական, տնտեսական հաշվարկներ: 

«Երբ հարցման պատասխանը ստացել եմ, ուղարկել եմ քննիչին, ասել եմ, որ գործի համար կարևոր նշանակություն ունի այս տեղեկատվությունը, միջնորդում եմ ապացույց ճանաչել ու  կցել գործին: Քննիչը մեզ մերժել է, իր կարծիքով՝ նշանակություն չունի»,- ասաց Ամրամ Մակինյանը: