Ձեր վստահելի աղբյուրը

Հանրապետությունում, մանավանդ՝ դպրոցներում ու մանկապարտեզներում սուր շնչառական հիվանդությունները թեև, կարծես թե, անկում են ապրում, այնուամենայնիվ հասարակությունը շարունակում է տագնապել՝ այս անգամ օր օրի ավելի մեծ տարածքներ ընդգրկող կորոնավիրուսի պատճառով։

Ընդ որում՝ հենց սեզոնային շնչառականներն են մեղավոր, որ մարդիկ վստահություն չունեն կորոնավիրուսին դիմագրավելու պահով։ Մտածում են՝ եթե սեզոնայինի դեմը չկարողացան առնել, և երեխանները արդեն «երկրորդ շրջանն» են հիվանդանում, ապա ինչ կլինի, եթե կորոնավիրուսը ներթափանցի երկիր։

Մասնագետների խորհուրդների բացակայությունը ստիպում է քաղաքացիներին ինքնուրույն միջոցներ ձեռնարկել։ Արդյունքում՝ դեղատներում բժշկական դիմակների դեֆիցիտ է։ Գուցե և՝ ոչ քաղաքացիների ձեռներեցության պատճառով...

Սահմանակից Իրանում կորոնավիրուսը արդեն պտտվում է, Վրաստանում ևս մեկ հաստատված դեպք կա, իսկ Հայաստանում դեռ չկա ոչ սոցիալական գովազդ, ոչ ասենք ծանուցող ու զգուշացնող պաստառներ, ոչ էլ իհարկե՝ այն կորցրած վստահությունը, որ երկրի առողջապահությունը ունի վարակներին կանխարգելող կամ դիմագրավող մտածված քաղաքականություն։

Նկատել եք երևի՝ բացը փորձում են լրացնել լրատվամիջոցները, գտնելով, խոսեցնելով ու տարածելով նյութեր, թե՝ ինչ անել վիրուսային վարակի դեպքում։

Թեև՝ ինչպես պետք է կորոնավիրուսը տարբերակել սովորական գրիպից և ինչ պետք է անել վիրուսից խուսափելու համար, մասնագետները միանշանակ պատասխան չեն տալիս։

Պատճառներից մեկն այն է, որ կորոնավիրուսն իր ախտանիշներով նման է սովորական գրիպին, և հասկանալու համար՝ արդյոք մարդը վարակված է կորոնավիրուսով, պետք է անցնել դիագնոստիկ հետազոտություն։
Այնուամենայնիվ, մասնագետները պնդում են՝ ցանկացած օդակաթիլային տարբերակով փոխանցվող վիրուսից խուսափելու համար պետք է պահպանել որոշակի կանոններ։

Համաճարակաբան Վլադիմիր Դավիդյանցը նշեց, որ վիրուսի դեպքում պետք է հիվանդին մեկուսացնել։

«Դա տարրական գիտելիք է, որ պետք է քաղաքացին իմանա։ Ինչո՞ւ պարզ չէ, որ հիվանդ երեխային չպետք է ուղարկել դպրոց, որպեսզի նա վիրուսը չտարածի։ Նրան պետք է առանձին սենյակում պահեն, վիտամիններով հարուստ սնունդ տրամադրեն, որպեսզի օրգանիզմը դիմակայի վիրուսին։ Բացի այդ, պետք է օրվա մեջ մի քանի անգամ օդափոխեն սենյակը, փոշին մաքրել օրը մի քանի անգամ։ Հիվանդն էլ պետք է հոսող ջրով անընդհատ լվանա ձեռքերը։  Սրանք ամենապարզ գործողություններն են, որ պետք է գրիպով վարակված մարդն անի»,- նշեց Դավիդյանցը։

Իսկ ինչ պետք է անել, եթե չկա հոսող ջրով լվացվելու և ձեռքերը ախտահանելու տարբերակ։

«Նորք» ինֆեկցիոն կլինիկական հիվանդանոցի փոխտնօրեն Էդուարդ Զարդարյանը մեզ հետ զրույցում ասաց, որ ցանկալի է ձեռքի տակ ունենալ ախտահանիչներ, և օրվա մեջ մի քանի անգամ այդ նյութերով սրբել ձեռքերը։

«Առաջնահերթ է, որ վարակված քաղաքացին հասարակական վայրեր դուրս գալուց բժշկական դիմակ կրի, որպեսզի դիմացինին չվարակի։ Բացի այդ, պետք է անընդհատ լվանա ձեռքերը, իսկ եթե չկա հոսող ջուր, օրինակ հասարակական տրանսպորտից իջնելիս, ապա պետք է ախտահանիչներով մաքրի ձեռքերը։ Դա կուլտուրայի նշան է, մարդիկ պետք է իմանան։ Շատ ավելի ցանկալի է, որ հիվանդը տանը մնա, դպրոցահասակ երեխան էլ պետք է տանը բուժվի, նոր գնա դպրոց»,- ասաց Զարդարյանը։

Panorama.am-ը հետաքրքրվեց, թե բժշկական դիմակների դեֆիցիտի պայմաններում  ինչ այլընտրանքային տարբերակ կարելի է կիրառել։

Էդուարդ Զարդարյանը նշեց, որ տան պայմաններում ևս հնարավոր է բժշկական դիմակ ստանալ, միայն պետք է թանզիվը 4 տակ ծալել և կարել։ Բժիշկը շեշտեց, այս տարբերակով ստացված դիմակը պետք է առավելագույնը 2 ժամ օգտագործել.

«Բայց ևս մեկ անգամ ուզում եմ կրկնել, որ հիվանդ մարդիկ պետք է աշխատեն տանը մնալ և չվարակել դիմացինին։ Իսկ տանից դուրս գալու դեպքում էլ պարտադիր պետք է բժշկական դիմակ կրեն»։

Դպրոցներում և մանկապարտեզներում ևս երեխաները պետք է դասամիջոցից դասամիջոց լվանան ձեռքերը, մասնագետները նշում են, որ խիստ կարևոր է դասասենյակների օդափոխումն ու մարքությունը։

Նշված պահանջը թերևս շատ քիչ դպրոցներում է հնարավոր բավարարել, քանի որ, ծնողները ահազանգում են, որ դպրոցներում ոչ օճառ կա, ոչ էլ ձեռքերը չորացնելու համար նախատեսված անձեռոցիկ։ Առողջապահության նախարարությունից ասում են, որ իրենք դպրոցներին տրամադրում են կոնկրետ նորմեր, որոնց կատարման վերահսկողությունը քաղաքապետարանինն ու մարզպետարաններինն է։ Վերջիննրես էլ միայն ահազանգերի դեպքում են այցելում դպրոցներ՝ տեսնելու՝ արդյոք պայմաններ կան հիգենայի նվազագույն կանոններին հետևելու համար։

ՀՀ ԱՆ հիվանդությունների վերահսկման և  կանխարգելման կենտրոնից մեզ հետ զրույցում ասացին, որ  կորոնավիրուսներով և սուր շնչառական հիվանդություններով չվարակվելու համար առաջնային է  հետևել ձեռքերի, ինչպես նաև հազալու և փռշտալու հիգիենայի պահպանման կանոններին։ Հազալիս կամ փռշտալիս անհրաժեշտ է փակել բերանը և քիթը արմունկով կամ անձեռոցիկով. անձեռոցիկն օգտագործելուց հետո անմիջապես գցել աղբամանը։ Չվարակվելու համար, խորհուրդ է տրվում հնարավորինս խուսափել կենդանիների հետ չպաշտպանված շփումից՝ օգտագործելով անհատական պաշտպանիչ միջոցներ, իսկ շփման դեպքում՝ մանրակրկիտ լվանալ ձեռքերը, ինչպես նաև լիարժեք եփել միսը նախքան մատուցելը։

Մասնագետները խորհուրդ են տալիս նաև անպայման շատ հեղուկ օգտագործել, որպեսզի օրգանիզմը մաքրվի թունավոր նյութերից։

Ըստ մեր զրուցակից բժիշկների, օդում առկա փոշին ավելի է մեծացնում սեզոնային վիրուսներով վարակվելու ռիսկերը, քանի որ շատ վիրուսներ փոշոտ պայմաններում ավելի երկար են գոյատևում։

Իսկ ի՞նչ է արվում քաղաքի օդը փոշուց մաքրելու համար։

Հարցին՝ արդյոք քաղաքապետարանը որևէ պայքար մղում է օդում առկա փոշու դեմ, Երևանի քաղաքապետարանի մամուլի խոսնակ Հակոբ Կարապետյանը պատասխանեց, որ իրենք իրականացնում են կանաչապատում և շինարարության ընթացքում նորմերի պահպանման վերահսկողություն.

«Այս երկու տարբերակով ենք մենք օդում առկա փոշու դեմ պայքարում։ Կոնկրետ քաղաքապետարանի գործառույթները սրանք են»,- ասաց Կարապետյանը։

Մեր ճշտող հարցին՝ չկա՞ արդյոք այլ տարբերակ օդը փոշուց մաքրելու համար, Կարապետյանը արձագանքեց՝ նեղ մասնագիտական հարց է, գուցե և կա, սակայն քաղաքապետարանը վերոնշյալ երկու տարբերակով է օդի աղտոտման դեմ պայքարում։

Իսկ քամու բարձրացրած փոշու դեմ թերևս ոչ ոք չի պայքարում։