Ձեր վստահելի աղբյուրը

Կորոնավիրուսի վարակման կամ բռնկման դեպքեր են գրանցվել բոլոր մայրցամաքներում, բացի Անտարկտիդայից: Եվրանյուզի հաղորդմամբ, այսօր առավոտյան արդեն տեղեկատվություն է ստացվել, որ Նոր Զելանդիայում  գրանցվել է COVID-19-ով առաջին հիվանդը:

Եվրամիությունում առավել ծանր իրավիճակ է Իտալիայում, այնտեղ 650 վարակված մարդ կա,  56-ը գտնվում են ծանր վիճակում, 17 մարդ մահացել է:

Առողջապահության համաշխարհային կազմակերպության գլխավոր տնօրեն Թեդրոս Ադհանոմ Հեբրեյեսուսն ասել է. «Յուրաքանչյուր պետություն պետք է հասկանա, որ իրենց մոտ կհայտնվեն COVID-19-ով առաջին պացիենտները: Եվ հետո կորոնավիրուսն արդեն կտարածվի: Որքա՞ն արագ: Ի՞նչ միջոցառումներ պետք է ձեռնարկել: Առողջապահության նախարարությունը ունի՞ հնարավորություն, որպեսզի վերահսկողության տակ վերցնի վարակի տարածումը: Այդ հարցերին պետք է ուղիղ պատասխանել՝ չմտածելով, որ ամեն ինչ կանցնի ինքն իրեն, հնարավոր կլինի խուսափել, հույսը դնելով հանգամանքների լավ դասավորության վրա:  Քանի որ դա կարող է դառնալ ճակատագրական սխալ»:

Նշվում է, որ վերջին օրերին Չինաստանի 24 շրջանում չի արձանագրվել կորոնավիրուսով վարակման որևէ դեպք: Այնուհանդերձ, վարակվածների թիվը մնում է շատ մեծ՝ ավելի քան 78 հազար մարդ, վերջին 24 ժամում 44 մահվան դեպք է գրանցվել: