Ձեր վստահելի աղբյուրը

«Համաշխարհային տնտեսության մեջ 2020 թվականին կգրանցվի մոտ 3.3 տոկոս տնտեսական աճ, իսկ 2021-ին՝ 3.4 տոկոս»,- այսօր լրագրողների հետ զրույցում ասաց տնտեսագետ Վիլեն Խաչատրյանը։

Տնտեսագետի խոսքով, ԱՄՆ-ում տնտեսական աճը ևս կնվազի, որովհետև կան որոշակի բացասական զարգացումներ, որոնք պայմանավորված են ԱՄՆ-Չինաստան հարաբերություններով։ Ըստ Խաչատրյանի, ԱՄՆ-ում 2020 թվականին ԱՄՆ-ում կգրանցվի 2 տոկոս, և 2021-ին՝ 1.7 տոկոս տնտեսական աճ։

Ինչ վերաբերում է Չինաստանին, 2020-ի համար արժույթի միջազգային հիմադրմամը կանխատեսել է մոտավորապես 6 տոկոս, և 2021-ին՝ 5.8 տոկոս տնտեսական աճ։

«Կա նաև տեսակետ, որ այս համաճարակից հետո Չինաստանը կարող է ձեռք բերել մի շարք ակտիվներ, քանի որ եվրոպական ընկերությունների մեծ մասը, բորսայական համակարգում մոտ 5 տրիլիոն դոլարի անկումից հետո էժան գներով վաճառում է ակտիվները։ Այսինքն՝ կորոնավիրուսի հետ կապված ճգնաժամը Չինաստանին կարող է առավելություններ տալ, քանի որ վերջինս կարճաժամկետ պլաններ չի կազմում, և համաճարակը հաղթահարելուց հետո կկարողանա տնտեսական բարձր ցուցանիշ գրանցել համաշխարհային տնտեսության մեջ»,- ասաց տնտեսագետը։

Խաչատրյանի խոսքով, հետաքրքրական է նաև, որ համաշխարհային շուկայում նավթի գներն անկում են ապրում։ 2020 թվականին անկումը կլինի մոտ 4.3 տոկոս, իսկ 2021-ին՝ 4.7 տոկոս։

ԵԱՏՄ երկրների բլոկում Հայաստանի տնտեսական  աճի ցուցանիշն, ըստ Խաչատրյանի, բավականին բարձր էր. «Եվ հարևան, և թե ԵԱՏՄ երկրների շրջանակում մենք ունենք առավելություն, և անգամ 2020 թվականի համար արժույթի միջազգային հիմնադրամի կանխատեսումները 4.8-5 տոկոսի շրջանակում են։ Օրինակ, Ադրբեջանն ունի տնտեսական աճի ավելի ցածր տեմպեր։ Իհարկե, նավթի գների անկումը ևս կարող է իրենց ազդեցությունն ունենալ»։

Ըստ տնտեսագետի, ԵԱՏՄ անդամ պետություններից Բելառուսի տնտեսական աճի ցուցանիշներն են մտահոգիչ. այնտեղ 1 տոկոսի էլ չի  հասնում կանխատեսվող տնտեսական աճը։

Իսկ ահա Ռուսաստանի դիրքերը, 2020 թվականին կարող են  համեմատաբար բարելավվել։

Ըստ Խաչատրյանի, այս պահին Հայաստանն ունի առավելություն, քանի որ ԵԱՏՄ անդամ չհանդիսացող պետություններից առանց մաքսատուրքի դեռևս կարող է 650 անուն ապրանք ներմուծել. «Այս դեպքում թանկացումների ալիքից կարող ենք խուսափել»։

Ինչ վերաբերում է ՀՀ-ում տնտեսական աճի որակական հատկանիշներին, ապա Խաչատրյանը նշեց՝ 2019 թվականի տնտեսական աճն ունի որակական առումով լավ ուղղվածություն։

«Դա պայմանավորված է նաև ՀՀ պետական պարտքի համեմատաբար քիչ աճով։ Տարիներ շարունակ մեզ մոտ տնտեսական աճն ապահովվել է պարտքով, իսկ 2019 թվականին, 2018 թվականի համեմատ և ներքին, և արտաքին պարտքի աճը կազմել է 402 մլն դոլար, որից 252 միլիոնը արտաքին, և 148-ը՝ ներքին պարտք է։ Այսինքն՝ մենք քիչ պարտք վերցնելով ենք տնտեսական աճ ապահովել»,- նշեց Խաչատրյանը։