Ձեր վստահելի աղբյուրը

Նախագահը լիազորված էր Սահմանադրական կարգին սպառնացող անմիջական վտանգի դեպքում իրականացնել իրավիճակից թելադրվող միջոցառումներ և այդ մասին ուղերձով դիմել ժողովրդին, որը պատշաճ կատարվել է նախագահի կողմից: Ռոբերտ Քոչարյանի ազատության հանձնախմբի կողմից կազմակերպած «Մարտի 1-ի գործը՝ հետհեղափոխական Հայաստանում» տեղեկատվական կոնֆերանսին ասաց  ՀՀ երկրորդ նախագահ Ռոբերտ Քոչարյանի փաստաբանական խմբի անդամ Սարգիս Գրիգորյանը:

Արտակարգ դրության հետ կապված նա նշեց, որ 2005 թվականի Սահմանադրության 55-րդ  հոդվածը հստակ սահմանում է նախագահի այդ լիազորությունները՝ եթե առկա էր սահմանադրական կարգին սպառնացող վտանգ,  իսկ 2008 թ. մարտի 1-ին  այդ վտանգն անմիջականորեն առկա էր:

«2008 թվականի մարտի 1-ին առաջացել էին այնպիսի վտանգներ, որոնց դիմակայելու համար սովորական սահմանադրական միջոցները բավարար չէին: Մարտի 1-ի իրադարձությունները ստեղծել էին բացառիկ իրավիճակ, որի դեպքում պետք է կասեցվեին սահմանադրական կարգավորումների մի մասը և դրանք փոխարինվեին բացարձակ կարգավորումներով: Առկա էր հուժկու վտանգ ներքին անվտանգությանը, որոնք պահանջում էին հատուկ միջոցների իրականացում»,- ասաց Ս. Գրիգորյանը:

Նրա խոսքով, 2008 թ. մարտի 1-ի ընդունված արտակարգ դրության հրամանագիրը բացառապես հենվում էր Սահմանադրության մեջ նշված իրավական հիմքերի վրա:

«Թե հրամանագիրը, թե կիրառված միջոցառումները համապատասախանել են երկու հիմնական սկզբունքներին՝ օրիանականությանն ու համաչափությանը: Արտակարգ դրությունը հայտարարվել է նորմատիվ իրավական ակտով, եղել է հրամանագիր, նախագահի լիազորությունների շրջանակներում: Ինչ վերաբերում է  համաչափությանը, ապա քաղաքացու որոշ իրավունքների սահմանափոկումները կրել են ժամանակավոր բնույթ, համապատասխանել են վտանգի աստիճանին, պահպանվել են Սահմանադրության 44-րդ հոդվածի պահանջները»,- ասաց Ս.Գրիգորյանը: