Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը, այն կարծիքին է, որ նախկին վարչապետները չեն խուսափի ներկայանալ դատարան՝ Ռոբերտ Քոչարյանի համար անձնական երաշխավորություն ներկայացնելու համար:

«Նրանց հետ համաձայնություն կա, նրանք պատրաստ են գալ դատարան: Ենթադրում եմ, որ խնդիրներ չպետք է լինեն ու իմ խորին շնորհակալությունն եմ հայտնում այդ քայլին գնալու համար: Հաստատապես գիտեմ՝ նրանք պատկերացնում են, թե ինչ հարձակումների են ենթարկվելու իշխանամերձ շրջանակների կողմից», - Ռոբերտ Քոչարյանի ազատության հանձնախմբի կողմից կազմակերպած «Մարտի 1-ի գործը՝ հետհեղափոխական Հայաստանում» տեղեկատվական կոնֆերանսին լրագրողների հետ զրույցում ասաց նա:

Հիշեցնենք, որ Հայաստանի Հանրապետության նախկին վարչապետեր Վազգեն Մանուկյանը, Խոսրով Հարությունյանը, Կարեն Կարապետյանը, ինչպես նաև Արցախի Հանրապետության նախկին վարչապետ Անուշավան Դանիելյանը պատրաստվում են ՀՀ երկրորդ նախագահ Ռոբերտ Քոչարյանի խափանման միջոց կալանքն իրենց անձնական երաշխավորությամբ փոխարինելու առաջարկ ներկայացնել դատարանին։

Լ.Քոչարյանի խոսքով, դժվար է հավատալ, որ դատավոր Աննա  Դանիբեկյանը կիրականացնի արդարադատություն։ Նա բացատրում է սա՝  ամիսներ շարունակ ականատես եղած իրադրությունով։ Ռոբերտ Քոչարյանի որդու խորին համոզմամբ,  դատավորը  ենթարկվում է ճնշումների՝ նկատի ունենալով դատավոր Դավիթ Գրիգորյանի փորձը, որի նկատմամբ Ռ. Քոչարյանի խափանման միջոցը փոխելուց հետո  հարուցվել է քրեական գործ, լիազորությունները կասեցվել են, դատարանները շրջափակվել էին:

«Կարծում եմ՝ այդ ամենն արվել է, որպեսզի հաջորդ դատավորներն  իմանան, որ այսպես էլ կարող է լինել: Դատավոր Դանիբեկյանը հետևում է հենց նրան,  ինչ որ իրենից ակնկալում են իշխանությունները:

Շատ լավ կլինի, որ իր մեջ խիզախություն, քաջություն գտնի, վերադառնա օրինական դաշտ, իրականացնի արդարադատություն առանց մտավախությունների: Իհարկե, դժվար է հավատալ, բայց իմ ակնկալիքը սա է»,- ասաց Լ. Քոչարյանը: