Ձեր վստահելի աղբյուրը

Ռոբերտ Քոչարյանի նկատմամբ դատավարությունը կարող է բարդացնել հարաբերությունները Մոսկվայի և Երևանի միջև։ Այս մասին գրել է Վլադիմիր Սոլովյովը՝ «Կոմերսանտում» հրապարակված «Ոչ ոք չի մոռացվել և ոչինչ չի փակվել» հոդվածում։

Նշվում է, որ մարտի 3-ին Երևանի դատարանը չկարողացավ որոշում կայացնել ՀՀ նախկին նախագահ Ռոբերտ Քոչարյանի պաշտպանական կողմի միջնորդության վերաբերյալ, որը պահանջում էր փակել քրեական գործը: Դատավորը դադար վերցրեց «քննելու գործի բոլոր հանգամանքները և ապացույցները»: Իշխանության ուզուրպացիայի մեջ մեղադրվող նախկին նախագահի փաստաբաններն ու հարազատները պատրաստվում են նրան, որ դիմումը կմերժվի և գործընթացը, որը սկսվել է գրեթե երկու տարի առաջ, կշարունակվի ևս մի քանի տարի:

«Պարոն Քոչարյանի հետապնդման թեման, որի հետ բարեկամությունը չի թաքցնում նախագահ Վլադիմիր Պուտինը, դառնում է ռուս-հայկական հարաբերությունների առանցքային գրգռիչներից մեկը»,- գրում է հոդվածագիրը:

Ասվում է, որ սահմանադրական կարգը տապալելու քրեական գործով, բացի Ռոբերտ Քոչարյանից, անցնում են նաև ՀԱՊԿ նախկին գլխավոր քարտուղար Յուրի Խաչատուրովը, ՀՀ ՊՆ նախկին նախարար Սեյրան Օհանյանը, ինչպես նաև նախագահի աշխատակազմի նախկին ղեկավար Արմեն Գևորգյանը:

«Մարտի 3-ի, ինչպես նաև նախորդ դատական նիստերին ներկա էին և՛ նախկին նախագահի կողմնակիցները, և՛ նրա ընդդիմախոսները: Վերջիններս ամբաստանյալներին մեղավոր են համարում 2008 թվականի մարտի իրադարձությունների համար»,- գրում է Սոլովյովը՝ հավելելով, որ 12 տարի առաջ Երևանում ընդդիմության հանրահավաքը, որը չէր ընդունում նախագահական ընտրությունների արդյունքները, բռնի ցրվեց, բախումների հետևանքով սպանեցին մարդիկ: Բողոքի ակցիաների կազմակերպիչներից մեկը գործող վարչապետ Նիկոլ Փաշինյանն էր, որին այն ժամանակ ընդդիմադիր գործունեությունն արժեցավ 2 տարվա ազատազրկում:

Ինչպես գրում է Սոլովյովը, երբ Ռոբերտ Քոչարյանը մտավ դատական նիստերի դահլիճ, այնտեղ ներկա նրա աջակիցները ոտքի կանգնեցին ու նրան դիմավորեցին ծափերով, իսկ հակառակորդները՝ բղավոցներով։

«Նիստին դատավոր Աննա Դանիբեկյանը պետք է քննարկեր քրեական հետապնդումը դադարեցնելու պարոն Քոչարյանի պաշտպանության հայցը: Նույն միջնորդություններով էին դիմել նաև մյուս ամբաստանյալների փաստաբանները: Բայց տիկին Դանիբեկյանը որոշեց որոշում չկայացնել՝ «պաշտպանության միջնորդության վերաբերյալ որոշումը հետաձգել՝ մինչև գործի բոլոր հանգամանքները պարզվեն, և ապացույցները քննվեն: Դրանից հետո Ռոբերտ Քոչարյանի փաստաբանները հանդես եկան մեկ այլ նախաձեռնությամբ. նրանք ինքնաբացարկի միջնորդություն ներկայացրեցին Աննա Դանիբեկյանին, որի պատճառը, ինչպես ասաց նախկին նախագահի փաստաբաններից Հայկ Ալումյանը, Հայաստանի Գերագույն դատական խորհրդի նախագահ Ռուբեն Վարդազարյանի ավելի վաղ արած հայտարարությունն էր: Նա հարցազրույցներից մեկում ասել էր, որ իշխանությունները ցանկանում են՝ բոլոր դատավորները նման լինեն Արմեն Դանիելյանին, որը նախորդ տարվա հուլիսին Ռոբերտ Քոչարյանին կրկին կալանավորելու որոշում կայացրեց, և Աննա Դանիբեկյանին։ Բացարկի միջնորդության վերաբերյալ ևս նույն օրը որոշում չկայացվեց և այս հարցը հնարավոր է լուծել մինչև շաբաթվա վերջ»,- ասվում է հոդվածում:

Նշվում է, որ Ռոբերտ Քոչարյանի պաշտպանությունը չի ապավինում իր առաջարկների հաջողությանը: Ավելին, փաստաբան Արամ Վարդևանյանը չի բացառում, որ գործընթացը, որը սկսվել է 2018 թ-ին, կերկարաձգվի ևս այդքան, եթե ոչ ավելի, քանի որ, ինչպես «Կոմերսանտ»-ին ասել է Վարդևանյանը, մեղադրող կողմը և քննության կողմն այնպիսի մասշտաբային գործ են հարուցել, որ հնարավորություն չկար այն կարճ ժամանակ քննվի։

Ռոբերտ Քոչարյանի որդին՝ Լևոնը, «Կոմերսանտ»-ին տված հարցազրույցում նշել է, որ մեղադրող կողմը ներգրավվել է ավելի քան 800 վկա: Նրանց բոլորին պետք է լսեն, ինչը նույնպես կազդի գործի քննության ժամանակի վրա:

Իսկ թե կարո՞ղ են Ռոբերտ Քոչարյանի խափանման միջոցը փոխել, Արամ Վարդևանյանը դժվարացել է ասել:

Ըստ նրա, փաստաբանները մի քանի անգամ առաջարկել են, որ դատարանը իրենց պաշտպանյալին ազատի նախնական կալանքի կենտրոնից գրավի դիմաց, բայց դատավորը մերժել է այդ հայցը: Առաջիկայում, ինչպես ասել է «Կոմերսանտ»-ի զրուցակիցը, պաշտպանական կողմը դատարան կներկայացնի այս հարցով  երկրի երեք նախկին վարչապետների երաշխիքը:

«Մինչդեռ, Ռոբերտ Քոչարյանի դեմ գործը բացառապես Հայաստանի ներքին գործ չէ: Մոսկվան ի սկզբանե ուշադիր հետևում է քաղաքական գործչի նկատմամբ այս աղմկոտ գործընթացին, որը սերտ բարեկամական հարաբերությունների մեջ է Ռուսաստանի նախագահ Վլադիմիր Պուտինի հետ: Երբ գործընթացը սկսվեց 2018 թ-ին, Ռուսաստանի արտգործնախարար Սերգեյ Լավրովն ասաց, որ նման գործողությունները «հակասում են Հայաստանի նոր ղեկավարության հայտարարություններին, որ այն մտադրություն չունի քաղաքական նկատառումներով կազմակերպել իր նախորդների հետապնդումները»։

Հատկանշական է, որ երբ Ռոբերտ Քոչարյանի դեմ հարուցվեց քրեական գործ, պարոն Պուտինը զանգահարեց նրան և շնորհավորեց նրան ծննդյան օրվա կապակցությամբ:

Անցած հոկտեմբերին, երբ Երևանում տեղի ունեցավ Եվրասիական տնտեսական բարձրագույն խորհրդի նիստը, Ռուսաստանի ղեկավարը հանդիպեց ՀՀ նախկին նախագահի տիկնոջ՝ Բելլա Քոչարյանի, և նրա որդու՝ Լևոնի հետ: Հանդիպումը տեղի էր ունեցել Երևանում Ռուսաստանի դեսպանատանը, և բոլորն այն մեկնաբանեցին որպես աջակցության դրսևորում»,- ասվում է հոդվածում:

«Նման մարդը, մեծ երկրի նախագահը, երբ շնորհավորում է իմ հայրիկի ծննդյան տարեդարձը, Նոր տարին, հանդիպում է մեզ հետ, հավանաբար հասկանում է, որ մեր իշխանություններին դժվար թե դուր գա դա...։ Սա ցույց է տալիս, թե նա ինչպիսի մարդ է և ինչ ընկեր», - ասել է Լևոն Քոչարյանը «Կոմերսանտ»-ին:

Կրեմլում «Կոմերսանտ»-ի իրազեկ զրուցակցի խոսքով, ռուսական կողմը Հայաստանի երկրորդ նախագահի նկատմամբ գործընթացը համարում է քաղաքական: Ըստ նրա, Մոսկվան բազմիցս իր դիրքորոշումը ներկայացրել է Հայաստանի իշխանություններին: «Կոմերսանտ»-ի զրուցակիցը նշել է, որ եթե մոտ ժամանակներս Ռոբերտ Քոչարյանի շուրջ իրավիճակը իրավական հարթության մեջ չլուծվի, ապա նրա ձերբակալությունը կարող է վերածվել ռուս-հայկական երկկողմ հարաբերություններում ամենաակտուալ հարցերից մեկը: