Ձեր վստահելի աղբյուրը

Սահմանադրական դատարանի դատավոր ընտրված Վահե Գրիգորյանը փաստացի չի կատարում իր պարտականությունները։ Մամուլը բազմիցս գրել է, որ նա աշխատանքի չի գնում, փոխարենը բավականին բարձր աշխատավարձ է ստանում։

ՍԴ պաշտոնական կայքում հրապարակված աշխատակարգային որոշումից Panorama.am-ը տեղեկացավ, որ մի գործով զեկուցող նշանակված Գրիգորյանը նույնիսկ որոշման նախագիծ չի պատրաստել, ինչի հետևանքով դատաքննությունը մի քանի ամսով հետաձգվել է ու նույն գործով մեկ այլ զեկուցող է նշանակվել։

Խոսքը, մասնավորապես, վերաբերում է Կոտայքի մարզի առաջին ատյանի ընդհանուր իրավասության դատարանի դիմումի հիման վրա՝ ՀՀ քրեական օրենսգրքի 353.1-ին հոդվածի և դրա հետ փոխկապակցված՝ «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» ՀՀ օրենքի 7-րդ հոդվածի 3-րդ մասի 1-ին և 3-րդ կետերի՝ Սահմանադրությանը համապատասխանության հարցը որոշելու վերաբերյալ գործին։

Քանի որ Սահմանադրական դատարանի դատավոր Վ. Գրիգորյանը չի ներկայացրել սույն գործով որոշման նախագիծ և չի ներկայացել Սահմանադրական դատարանի նիստին, Սահմանադրական դատարանը որոշել է զեկուցով նշանակել ՍԴ դատավոր Ա. Խաչատրյանին։

«Գործի դատաքննությունն սկսելու ժամկետը 2019 թվականի դեկտեմբերի 17-ի ժամը 11.00-ից հետաձգել 2020 թվականի մարտի 31-ին՝ ժամը 11.00-ին»,- ասված է որոշման մեջ։

Հիշեցնենք, որ մոտ մեկ ամիս առաջ Yerevan.today-ը գրել էր. «Վահե Գրիգորյանը ՍԴ դատավոր է ընտրվել 2019 թվականի հունիսի 20-ին։ Այդ օրվանից ի վեր երբևէ մասնակցություն չի ունեցել ՍԴ նիստերին, քննարկումներին։ Սահմանադրական դատարանը պարբերաբար նիստեր է գումարում, որոշումներ է ընդունում, դատավորներից յուրաքանչյուրն ունի հասցեագրված գործեր։ Իսկ ի՞նչ է անում Վահե Գրիգորյանը։ Պարզապես ոչինչ։

Բայց ոչինչ չանելով հանդերձ, նա օգտվում է բոլոր այն իրավունքներից, որոնցով օժտված է ՍԴ դատավորը։ Վահե Գրիգորյանը 2019 թվականին ըստ աղբյուրի  ստացել է 10 միլիոն դրամից ավելի գումար` աշխատավարձի ու պարգևատրումների տեսքով, օգտվում է ծառայողական մեքենայից, առանձնասենյակից և այլն։ Ոչինչ չանելու համար պետբյուջեից այդքան գումար ստանալը, ճի՞շտ է, արդա՞ր է․ որովհետև ձեր ընկերն է, կոռուպցիա չէ, չէ՞»։