Հայ-վրացական հարաբերություններում այսօր նոր էլեմենտներ են նկատվում. Մելիքյան
«Հայաստան-Վրաստան միջպետական հարաբերությունների դինամիկան վերջին ժամանակներում ավելի ակտիվ է»,- այսօր լրագրողների հետ զրույցում ասաց քաղաքագետ Ջոնի Մելիքյանը։
Նրա խոսքով, թեև Վրաստանում ներքաղաքական զարգացումները մասամբ խոչընդոտ են հանդիսանում 2 պետությունների զարգացման գործում, այնուամենայնիվ վերջին կես տարում վարչապետների միջև կոնտակտը հաստատվել է։
«Դեռևս նախորդ տարի՝ Վրաստանի նախկին վարչապետի օրոք, երկար տարիների դադարից հետո առաջին անգամ տեղի ունեցավ միջկառավարական հանձնաժողովի նիստ, որն այս տարի ևս կանցկացվի։ Այս ֆոնի վրա շատ կարևոր էր, որ այցը տեղի ունենար, օրակարգային վերանայումներ լինեին»,- նշեց Մելիքյանը։
Ըստ քաղաքագետի, հայ-վրացական հարաբերություններում այսօր նոր էլեմենտներ են նկատվում։ Նրա խոսքով, եթե նախկինում հայկական կողմը խոսում էր հայ-վրացական հարևանային ռազմավարական խորը հարաբերությունների մասին, ապա այժմ ասվում է, որ Երևանում ցանկություն կա Վրաստանի հետ հարաբերությունները վերանայելու և շարժվելու դեպի ռազմավարական գործընկերություն։
«Դա երկար պրոցես է, բայց քանի որ երկու երկրներում էլ կարևորվում են հարաբերությունները, առաջարկն արվել է, և վրաց կողմը պետք է փոխադարձ քայլ անի՝ նշելով՝ ինչքանով են իրենք պատրաստակամ և որքանով է իրական այդ փոփոխությունների շղթան իրենց տեսանկյունից»,- ասաց քաղաքագետը։
Մելիքյանի խոսքով, վրաց կողմը ևս շահագրգիռ է Հայաստանի հետ հարաբերությունների զարգացմամբ. «Երկու կողմերն էլ շեշտադրում են տնտեսական զարգացումը, ինչի համար որպես նախադրյալ կարևոր է տարածաշրջանային անվտանգությունը։ Իսկ այդ տարածաշրջանային անվտանգությունը ներառում է նաև երկկողմ հարաբերությունների զարգացումը։ Պետք է միջպետական հարաբերությունները լինեն կանխատեսելի և վստահելի։ Այդ հիմքի վրա կկարողանանք կառուցել ակտիվ միջպետական օրակարգը։ Դրա համար նաև Վրաստանի պարագայում շատ կարևոր է ֆիքսել՝ «Վրացական երազանքի» օրոք սկսել էինք կիրառել բալանսավորված քաղաքականության մոտեցումը, ինչը նաև մեր պարագայում է երևում։ Երբ իրենց կարիք են ունենում Ադրբեջանի հետ որոշ հարցեր հստակեցնելու, մենք տեսնում ենք ակտիվություն հայկական ուղղությամբ, ինչը վրաց ազգային շահերից է բխում»։
Մելիքյանի կարծիքով, Հայաստանի նոր իշխանությունները փորձում են Վրաստանի հետ ընդհանրություններ գտնել։ Ունենալով նմանատիպ տնտեսություններ՝ դժվար է պատկերացնել, որ պետությունները կարող են իրար համար օգտակար լինել։
«Այստեղ փորձում ենք ընդհանրություններ գտնել։ Այս այցի ժամանակ ժողովրդավարական զարգացումը ևս մեկ ընդհանրացող գաղափար դարձավ։ Այստեղ մեզ միացնողը ժողովրդավարությունն ու անվտանգ տարածաշրջան ունենալու ցանկությունն է։ Վրացական կողմն էլ նշում է, որ Հայաստանի հետ հարաբերությունները վերանայման փուլում են։ Հիմա կարևոր է՝ այս ամենը կապիտալիզացնել։
Հյուսիս-հարավի մասով, օրինակ, կկարողանանք համատեղ տրանզիտային այլընտանք դառնալ Իրանի համար, էներգոկամուրջի ծրագիրը պետք է արագ ավարտին հասցնել՝ հարթակ դառնալով դրսի պետությունների համար։ Կարելի է նաև համատեղ ծրագրեր ներկայացնել։ Թե՛ Վրաստանը և թե՛ Հայաստանը առանձին-առանձին թույլ են, և միասին շատ են հնարավորությունները՝ որոշ տնտեսական ծրագրեր իրականացնելու »,- նշեց Մելիքյանը։
Հարակից հրապարակումներ`
Լրահոս
Տեսանյութեր
Գրետա Թունբերգ. Երկերեսանիություն ու կեղծավորություն է, որ COP29-ը տեղի է ունենում Ադրբեջանում
