Ձեր վստահելի աղբյուրը

«ՀՀ առողջապահության նախարարության ՁԻԱՀ-ի կանխարգելման հանրապետական կենտրոն» ՊՈԱԿ-ի՝ աշխատանքից հեռացման դիմում ներկայացրած աշխատակիցներն այսօր հավաքվել են կառավարության շենքի դիմաց:

«Երեկ նորից հերթական անգամ համոզվեցինք, որ նախարարության կողմից ձեռնարկված նախաձեռնությունը հիմնված էր կեղծ փաստարկների, սուտ ինֆորմացիայի վրա»,- հայտարարեց աշխատակիցներից մեկը:

Հիշեցնենք, որ կառավարության որոշմամբ «ՀՀ առողջապահության նախարարության ՁԻԱՀ-ի կանխարգելման հանրապետական կենտրոն» ՊՈԱԿ-ը միավորվում է «Նորք» ինֆեկցիոն կլինիկական հիվանդանոց ՓԲԸ-ին:

«Երեկ նախարարն Ազգային ժողովի բարձր ամբիոնից նորից ներկայացրեց սուտ տեղեկատվություն՝ խեղաթյուրելով, փոխելով մեր բողոքի իմաստը: Նա «ցիտում» է մեզ, որ բացականչում ենք՝ վերադարձրեք մեզ մեր տնօրինին, բայց այդ մասին որևէ անգամ չենք խոսել: Մեր տնօրենն ասել էր, որ այլևս չի պատրաստվում աշխատել կենտրոնում, ոչ մի դեպքում մեր պայքարը չկապենք իր հետ»,- ասում են աշխատակիցները:

Նրանց խոսքերով, նախարարն ասել է մասնագիտական քննարկում պետք էլ չի լինի, այնինչ այս համակարգի ներսում աշխատող մասնագետների հետ անհրաժեշտ է քննարկել, ճանապարհը գտնել, թե ինչպես զարգացնել համակարգը:

«Հնարավոր չէ առանց մասնագետների, որոնք ներսում են աշխատում, որոշեն փոփոխություն կատարել: Առանց իրական մասնագիտական քննարկման հնարավոր չէ: Նախարարն ասում է՝ հոգնել եմ մասնագիտական քննարկում առաջարկությունից, մենք էլ արդեն հոգնել ենք իրենց առաջարկել մասնագիտական քննարկում: Այսպիսի արհամարհական վերաբերմունք  մասնագետներին մեր երկիրը երևի երբևէ չի տեսել, համենայնդեպս բուժաշխատողները չեն տեսել:

Մեկ տարի է դիմել ենք տարբեր ձևերով, ուղղակի բացարձակ արհամարհվել ենք»,- ասաց աշխատակիցներից մեկը:

ՁԻԱՀ -ի կանխարգելման հանրապետական կենտրոնի բժշկական օգնության և սպասարկման  վարիչ Արշակ Ասմարյանն ասաց, որ նախարարի՝ մանավանդ ԱԺ-ում երեկվա ելույթից հետո իրենք ավելի են զայրացել ու վրդովվել:

«Երեկվա ելույթը 80-90 տոկոսով ապատեղեկատվություն էր, իրականության հետ  կապ չունեցող հայտարարություններ էին: Մեր պահանջները եղել են համակարգային դաշտում, մտավախությունները համակարգի փոփոխության հետ կապված վերաբերել են  բացասական կանխատեսումների»,- նշեց նա:

Ա. Ասմարյանի խոսքով, նախարարի հայտարարությունը, որ ՁԻԱՀ կենտրոնը տարիներ շարունակ հրաժարվել է համագործակցել բժշկական այլ կազմակերպուների հետ, բացարձակ չի համապատասխանում իրականությանը: Նա նշեց, որ նաև իրականությանը չի համապատասխանում տեղեկատվությունը, թե հրաժարվում են իրենց կենտրոնի լաբորատոր կամ այլ ախտորոշիչ սարքավորումներ տրամադրել այլ պացիենտների հետազոտմանը:

Նրանք ընդգծում են, որ «ՀՀ առողջապահության նախարարության ՁԻԱՀ-ի կանխարգելման հանրապետական կենտրոնն ու «Նորք» ինֆեկցիոն կլինիկական հիվանդանոցը ոչ  մի կրկնվող գործառույթ չունեն: