Ձեր վստահելի աղբյուրը

Իրանում պաշտոնյաների վարակման դեպքերի մասով  պաշտոնական տվյալներ չկան:  Դրանց մասին խոսվում է  միայն սոցցանցերում: Այս մասին  «Սիվիլնեթ»-ի թղթակցի հետ զրույցում ասել է  իրանահայ հասարակական գործիչ Գասպար Ամիրխանեանը:

Նրա խոսքով ՝ Իրանում մինչև 3513 վարակվածներ կան,  100-ից ավելի մահվան դեպք: Սակայն այս թվերը կրկին պաշտոնական տվյալներ չեն: Այսուհանդերձ, Իրանում հանրության շրջանում խուճապ չկա:

«Խուճապ բոլորովին չի նկատվում, թեպետ առաջին 2-3 օրերին  առողջապահական որոշ  հնարավորություններ ձեռք բերելու դժվարություններ եղան: Սակայն հիմա ամեն ինչ վերահսկելի է, սպիրտի պակասություն թեև  դեռ կա: Այսուհանդերձ չենք կարող ասել, որ մարդիկ Իրանում բնականոն կյանքով են ապրում ՝ շատերը տներից դուրս չեն գալիս, դպրոցները փակ են  մինչև իրանական տարվա վերջը , այնինքն՝  մարտի քսանը: Դրանից հետո Նովրուզն է, որի  ընթացքում դպրոցները ևս փակ կլինեն»,-ասաց Ամիրխանեանը:

Նովրուզի ընթացքում սպասվո՞ւմ է արդյոք զբոսաշրջային հոսք դեպի այլ երկրներ,  իրանահայ հասարակական գործիչը պատասխանեց, որ քիչ հավանական է այլ  երկրներ  զբոսաշրջային հոսք լինի:

«Իրանցիները Իրանի ներսում ևս բազաթիվ քաղաքներ էին այցելում: Այս տարի հնարավոր  է այդ թիվն ինջի զրոյի, քանի որ բոլոր սրբավայրերը փակ են, զբոսաշրջային կենտրոնները չեն աշխատում: Սա է պատճառը, որ  կանխատեսվում է, որ զբոսաշրջության ցուցանիշն այս տարի զրոյի կհասնի»,-ասաց նա:

Ինչ վերաբերում է Իրանի առողջապահական համակարգին, ապա իրանահայը տեղեկացրեց, որ վերջին օրերին  բուժօգնության տարբեր հաստատություններ, պետական իշխանության տարբեր օղակները թե տեղեկատվական ոլորտում,  և թե առողջապահական կանխարգելիչ քայլեր անելու ոլորտում բավականին աշխուժացել են:

«Շատ հետաքրիր է քայլ է նկատվում, որպեսզի հիվանդների հոգեկանը բարձրացնեն, բժիշկներն ու բուժքույրերը պար եղանակի ներքո շուրջպար են բռնում, որպեսզի հիվանդներն իրենց վատ չզգան:
Մի բան էլ, որը շատ հատկանշական է: Միջազգային առողջապահական կազմակերպության պատվիրակությունն արդեն Իրանում է  և երեկ պատվիրակության ներկայացուցիչը շատ բարձր գնահատեց Իրանի ձեռնարկած կանխարգելիչ քայլերը և շեշտեց, որ առողջապահական տեսակետից Իրանը տարածաշրջանում հզորագույն համակարգն ունի»,-ընդգծեց Գասպար Ամիրխանեանը:

Բանախոսի փոխանցմամբ՝ Իրանի հայ համայնքի երեք թևերը նույնպես միաջել են  կանխարգելիչ  միջոցառումներին: Դպրոցները արձակված են, ազգային մարմինները քայլեր են ձեռնարկել աջակցելու  թե համայնքին,թե պետական ծրագրերին: