Ձեր վստահելի աղբյուրը

Սիրիայի բանակի զինծառայողները Հալեպի մերձակայքում վերջերս ազատագրված Խայամ գյուղի ծայրամասում հայտնաբերել են մի քանի կիլոմետր ընդհանուր երկարությամբ ստորգետնյա թունելների ցանց, որտեղ գտնվում էին զինյալների շտաբերն ու ապաստարանները: Այս մասին ռուսական ՏԱՍՍ գործակալության և այլ լրատվամիջոցների լրագրողներին հաղորդել է սիրիական բանակի գնդապետ Աբդելհադեր Էլբիջը:

«Մենք երկար ժամանակ հետևել ենք այս տարածքին և զարմացել, թե ինչպես է գրոհայիններին հաջողվել գաղտնի տեղաշարժվել դիրքերով, փոխել դրանց տեղը: Բայց երբ մենք նրանց դուրս մղեցինք այստեղից և տեսանք այն ամենը, ինչ նրանք փորել և կառուցել են, ամեն ինչ ընկավ իր տեղը: Բայց դուք տեսնում եք, նույնիսկ դա չօգնեց նրանց», - ասել է սիրիացի սպան ՝ ցույց տալով զինյալների կահավորած օբյեկտները։

Նա մանրամասնել է, որ արտաքինից թվում էր, թե քարհանք է, բայց ստորգետնյա հատվածում սիրիական զորքերը հայտնաբերել են թունելների խճճված ցանց ՝ տասնյակ նեղ միջանցքներով:

«Սենյակներից մեկում ահաբեկիչների շտաբն էր, այստեղ գրասենյակային տախտակի վրա զետեղված էր կրակակետերի գտնվելու վայրի պլանը և հերթապահության ժամանակացույցը: Շտաբում նույնիսկ էլեկտրականություն կար: Զնդանները, որտեղից զինյալները մարտ էին վարում, հագեցած էին հանգստի սենյակներով և պահեստներով»,-ասել է Աբդելհադերը:

Ըստ գնդապետ Էլբիջի խոսքի՝  արտաքին ուժերն են գրոհայիններին օգնել ստորգետնյա ամրությունները կառուցել:

Պատերազմից առաջ գյուղում բնակվել է ավելի քան 3 հազար մարդ, որոնց մեծ մասը ռազմական գործողությունների բռնկումից հետո հեռացել էր այնտեղից: Իշխանությունները սկսել են մաքրել փլատակները և վերականգնել գյուղը, որտեղ գրեթե բոլոր տները վնասված են: Կվերականգնվի եռահարկ գյուղական դպրոցի տարածքը, որի մի մասը գրոհայինները վերածել էին հիվանդանոցի։