Ձեր վստահելի աղբյուրը

«Հիմնականը քրեական գործն է, որը պետք է ամբողջ տեղեկատվության հիման վրա եզրահանգման գա՝ արդյոք կազմակերպությունն է սխալ տվյալ ներկայացրել, թե պետական կառավարման մարմիններն են սխալ եղել»,- Ազգային ժողովում ասաց շրջակա միջավայրի նախարար Էրիկ Գրիգորյանը՝ պատասխանելով պատգամավորի հարցին, թե ի՞նչ նորություն կա Ամուլսարի գործով:

Նրա խոսքով, կան զուգահեռ որոշակի հետազոտություններ՝ ջրերի, հողի ուսումնասիրություններ, որոնք հիման  շրջակա միջավայրի նախարարությունն իր գործառույթների շրջանակում իրականացնում է, նաև նոր վերազինված  իր լաբորատորիայում:

Բնապահպան-իրավաբան Նազելի Վարդանյանը հետաքրքրվեց, թե  այդրո՞ք իրենց կողմից նախաձեռնված օրենսդրական փոփոխությունները, որոնց մի մասն ընդունվել են, մի մասը  նախատեսվում են, հիմք չեն, որպեսզի 21-րդ հոդվածի  2-րդ մասի 4-րդ կետով նոր օրենսդրական փոփոխությունների հիմքով ուժը կորցրած ճանաչվի մի շարք փորձաքննական եզրակացություններ, այդ թվում՝ Ամուլսարի:

Նախարարը պատասխանեց. «Օրենքի մեջ գրված է մի կետ՝ օրենսդրական փոփոխությունների  դեպքում ուժը կորցրած կարող է ճանաչվել, չէ՞: Հարյուրավոր օրենսդրական փոփոխություններ են լինում, հիմա մենք օրենսդրական փոփոխությունների հետևանքով Հայաստանում բոլոր փորձաքննական դրական եզրակացություններն այսօր ուժը կորցրած ճանաչե՞նք»:

Նազելի Վարդանյանն արձագանքեց. «Երբ որ Ընդերքի մասին օրենսգրքի փոփոխություն եղավ, ընդերքօգտագործման բոլոր թույլտվությունները ուժը կորցրեցին և նոր փորձաքննություն անցան, այդ թվում Ամուլսարը նորից փորձաքննություն անցավ»:

Նա նաև նշեց, որ նոր գործոններ կան, այս ներկայացված 13 կետում նշել են այդ գործոնները. «Ինչո՞ւ այս կետով չեք գնում ուժը կորցրած ճանաչելուն: Սա երկրորդ հիմքը:

Երրորդ հիմքը՝ իրենք ներկայացրել են կեղծ կամ թերի գործոններ, որոնք «Էլարդը» հաստատել է և այդ ճանապարհով չե՞ք գնում»:

Էրիկ Գրիգորյանն ասաց, երբ որ քրեական գործի շրջանակներում կպարզվի ու եզրակացություն կստանա, որ կազմակերպությունը կեղծ  տվյալներ է ներկայացրել, օրենսդրական հիմքը երբ որ կլինի, այդ դեպքում կեղծ տվյալների հիման վրա կայացրած վարչական ակտն առ ոչինչ կհամարվի:

«Այն օրը, երբ որ Փորձաքննական ՊՈԱԿ-ը մեզ տեղեկություն կտա, որ ի հայտ են եկել նոր էկոլոգիական գործոններ և այս  շրջակա միջավայրի ազդեցության գնահատման եզրակացությունը պետք է ուժը կորցրած ճանաչվի, այդ օրը  ուժը կորցրած կճանաչվի, բայց այդ փաստաթղթերը պետք է լինեն, որպեսզի շրջակա միջավայրի նախարարությունը կարողանա որոշում կայացնի: Չի կարող նախարարությունը որոշում  կայացնի, որովհետև մի հարցի վերաբերյալ ավելի մեծ հնչեղություն կա, մյուսի վերաբերյալ ավելի քիչ»,- ասաց նախարար Է.Գրիգորյանը։