Ձեր վստահելի աղբյուրը

«5-րդ ալիք» հեռուստաընկերության սեփականատեր Արմեն Թավադյանի կալանքը երկարաձգելու վերաբերյալ բողոքը կքննվի վաղը ժամը 16։00-ին նշանակված նիստում։ Լրագրողների հետ զրույցում հայտարարեց Թավադյանի փաստաբան Արամ Օրբելյանը։

Նա տեղեկացրեց, որ այսօրվա նիստին աշխատանքային ծանրաբեռնվածության պատճառով չէր ներկայացել դատախազը, խնդրել էր հետաձգել նիստը։

Վաղը քննարկվելու է Թավադյանին կալանքի երկարացման դեմ բողոքը։  Օրբելյանը հույս հայտնեց, որ դատախազն ու քննիչը կկարողանան ներկա գտնվել՝ ապահովելու նիստի կայացումը։

«Հույս ունենք, երբ անձի ազատության հարց է դրված, դատախազությունն ու քննչական մարմինը կկարողանան գտնել այն աշխատակցին, ով այդ պահին կարող է ծանրաբեռնվածությունը թեթևացնել ու ներկա գտնվել։ Պետք է հասկանանք, որ քննչական խմբում կա 4 քննիչ, Դատախազությունն էլ բավականին մեծ կառույց է, անհրաժեշտ է, որ դատախազների ու քննիչների բացակայության պատճառով կալանքի վերաբերյալ որևէ նիստ չբացակայի»,- ասաց Օրբելյանը՝ ընդգծելով, որ դատական նիստերի ձգձգումները պետք է նվազագույնի հասցվեն, ընդունելի չէ, որ ՀՀ-ի՝ ի դեմս դատախազության գործողությունների պատճառով անձի անազատության օրինականության քննությունը հետաձգվի։

Այսօր դատավոր Ազարյանը իրազեկել է դատախազին հայտնած ինքնաբացարկի միջնորդության վերաբերյալ կայացրած որոշման մասին, միջնորդությունը չի բավարարվել։ Պաշտպանները դատարանի որոշումը կստանան մեկ օրվա ընթացքում։

Այսօրվա նիստին ներկա է եղել նաև Արմեն Թավադյանը։

Հիշեցնենք, որ  Արմեն Թավադյանին և Վարուժան Մկրտչյանին մեղադրանք է առաջադրվել ՀՀ քրեական օրենսգրքի 340-րդ հոդվածի 4-րդ մասի 1-ին կետով:

Վարույթն իրականացնող մարմինը, ձեռք բերված ապացույցները բավարար համարելով քրեական գործից նշված անձանց վերաբերյալ անջատված մասով մեղադրական եզրակացություն կազմելու և գործը դատարան ուղարկելու համար։