Ձեր վստահելի աղբյուրը

«Մենք ուզում ենք ունենալ բարձր արտադրողական և նորարարական ՓՄՁ-ներ»,- «Ամերիա» ՓԲ ընկերության իրականացրած Փոքր և միջին ձեռնարկատիրության ոլորտի վերաբերյալ ծավալուն հետազոտության շնորհանդեսին հաջորդած պանելային քննարկմանն ասաց ՀՀ ԱԺ տնտեսական հարցերի մշտական հանձնաժողովի նախագահ Բաբկեն Թունյանը՝ պատասխանելով հարցին, թե փոքր և միջին ձեռնարկատիրության ոլորտի  զարգացման հնգամյա ռազմավարության իրականացման արդյունքում  հինգ տարվա ընթացքում ի՞նչ է փոխվելու ոլորտում:

Քննարկմանը ներկա  էկոնոմիկայի փոխնախարար Նաիրա Մարգարյանն ասաց, որ ռազմավարության թիրախը հենց դա է՝ ունենալ բարձր արտադրողական և նորարարական ՓՄՁ-ներ:

Քննարկումը վարող «Ամերիա» ՓԲԸ կառավարման խորհրդատվական ծառայության տնօրեն Տիգրան Ջրբաշյանն ասաց, որ իրականության մեջ, ցավոք, երբ  նայել է այդ ռազմավարությունը, իր մոտ միանշանակ պատասխան չի ստեղծվել, թե պետությունն ինչ է ուզում:

«Գուցե քննարկման արդյունքում է դա ձեզ մոտ ձևավորվել, բայց այն տեքստից, որն առանց քննարկման, առանց ձեզ հետ շփվելու կարողացել եմ ընկալել, այդ բանը չի բխում: Այնտեղ բազմաթիվ այլ միջոցառումներ կան, որոնք ուղղված չեն բարձր արտադրողական և նորարարական ՓՄՁ-ներ ունենալուն:  Ստացվում է իրականության մեջ կա, գուցե իմաստ ունի ռազմավարությունը խմբագրել և առաջ անցնել»,- ասաց նա:

Փոխնախարարն արձագանքեց, որ եթե բանավեճն այսպեսին պետք է լիներ,   երևի թե ռազմավարությունը պետք է լիներ, որպեսզի կարողանային գնահատել:

«Ամեն դեպքում մեր բոլոր ջանքերն ուղղված են եղել նրան, որպեսզի էկոհամակարգը ձևավորվի այնպես, որի մեջը կարողանան զարգանալ նորարար ու արտադրողական ՓՄՁ-ներ: Պետք է զարգացնենք էկոհամակարգը, իսկ դա բազմաթիվ միջոցառումների, կոմպլեքս գործողությունների արդյունք է»,- ասաց Ն.Մարգարյանը: