Ձեր վստահելի աղբյուրը

Մեծ Բրիտանիայի առողջապահության նախարար և պահպանողական պատգամավոր Նադին Դորիսի մոտ ախտորոշվել է կորոնավիրուս:

Դորիսը, որն առաջին պատգամավորն է, ում մոտ հայտնաբերվել է վարակը, ասել է, որ վիրուսի  հայտնաբերվելուց հետո ինքը իրականանացնում է բոլոր նախազգուշական միջոցներն ու ինքնամեկուսացել է տանը:

Նախարարը հայտնել է նաև, որ համապատասխան մարմինը կգտնի բոլոր այն մարդկանց, ում հետ ինքը շփումներ է ունեցել։ Իսկ, թե քանիհանդիպումներ է ունեցել նախարար Դորիսը, դեռևս պարզ չէ։

62-ամյա նախարարը նշել է, որ ավելի մտահոգված է իր 82-ամյա մայրիկի համար, ում մոտ արդեն հազ է առաջացել։

Առողջապահության նախարարությունից հայտնում են, որ նախարարի մոտ  առաջին ախտանշաններն ի հայտ են եկել նախորդ հինգշաբթի՝ նույն օրը, երբ նա մասնակցել է վարչապետ Բորիս Ջոնսոնի կողմից կազմակերպված միջոցառմանը, և ուրբաթ օրվանից ինքնամեկուսացել է: Չի նշվում, թե արդյոք Ջոնսոնը թեստ անցել է, թե ոչ։

Ինչպես գրում է BBC-ն, Մեծ Բրիտանիայում վիրուսից մահացել է 6 մարդ և ընդհանուր առմամբ  382 մարդ վարակված է։

Միևնույն ժամանակ, Բրիտանիայի Ազգային առողջության ինստիտուտն էլ ասում է, որ մեծացնում է վարակի համար մարդկանց թեստավորելու իր կարողությունը։ Դա կնշանակի օրական 10,000 թեստավորում. ներկայումս իրականացվում է 1500-ը: