Ձեր վստահելի աղբյուրը

«5-րդ ալիք» հեռուստաընկերության սեփականատեր Արմեն Թավադյանի կալանքը երկարաձգելու դեմ պաշպանների  բողոքը  քննելուց հետո վերաքննիչ դատարանը հեռացավ խորհրդակցական սենյակ։

Նիստի ավարտից հետո Թավադյանի պաշտպան Արամ Օրբելյանը տեղեկացրեց, որ նիստի ընթացքում իրենք ներկայացրել են դիրքորոշումները,  դատախազն ու քննիչը ներկայացրել են  առարկություններ, ապա պաշտպանները հանդես են եկել հայտարարություններով։

«Որոշման հրապարակումը ենթադրվում է օրվա վերջ, դեռ հստակ ժամ սահմանված չէ։ Դատարանը հրապարակելուց 30-40 րոպե առաջ կտեղեկացնի, կմոտենանք»,-ասաց Օրբելյանը։

Փաստաբանը նշեց, որ ի հայտ եկած նոր հանգամանքների հիման վրա հավելյալ հիմնավորումներ են ներկայացվել իրենց կողմից՝ ելնելով Արմեն Թավադյանի իրավունքներն առավելագույնը պաշտպանելու սկզբունքից։

«Մենք միշտ ամենավատ նիստից հետո էլ լավ ակնկալիքներ ենք ունենում։ Կտեղականանք որոշման մասին, տեքստը կստանանք, կարիք լինի, կմեկնաբանենք»,-ասաց նա։

Հիշեցնենք, որ փետրվարի 19-ին դատարանը բավարարել էր քննչական մարմնի միջնորդությունը Թավադյանի կալանքը ևս երկու ամսով երկարացնելու վերաբերյալ։ Ահա այս որոշումն են բողոքարկում փաստաբանները՝  այն որակելով ոչ հիմնավոր ու անօրինական։ Նրանք նշում են,  որ Թավադյանին ներկայացված մեղադրանքը պատշաճ նկարագրված չէ, բացի այդ, քննությանը խոչընդոտելու, քննությունից խուսափելու ռիսկը բավարար նվազ է։

Արմեն Թավադյանին մեղադրանք է առաջադրվել ՀՀ քրեական օրենսգրքի 340-րդ հոդվածի 4-րդ մասի 1-ին կետով: