Ձեր վստահելի աղբյուրը

«ՀՀ առողջապահության նախարարության ՁԻԱՀ-ի կանխարգելման հանրապետական կենտրոն» ՊՈԱԿ-ի աշխատակիցների այսօրվա բողոքի ակցիային միացել էին նաև ՄԻԱՎ վարակակիրներ: Նրանք բոլորը միասի կառավարության շենքի դիմաց են՝ կրկին բարձրաձայնելով կառավարության որոշման՝ ՁԻԱՀ-ի կենտրոնը միավորել  «Նորք» ինֆեկցիոն կլինիկական հիվանդանոց ՓԲԸ-ին, սխալ լինելու մասին: 

ՁԻԱՀ-ի կենտրոնի աշխատակիցներից մեկն ասաց, որ այս պահի դրությամբ, այն մասնագետները, որոնք ազատման դիմում էին գրել՝ նաև այդպես բարձրաձայնելով իրեն դժգոհությունն այդ որոշումից, 26-ինը մակագրել են, այսինքն՝ ազատվել են աշխատանքից:

«Հիմա ՁԻԱՀ կենտրոնի մնացած մի քանի տասնյակ մասնագետները սպասում են, որ իրենց դիմումները մակագրեն: Արդեն ՁԻԱՀ կենտրոնում չունենք մասնագիտական բավականին ներուժ»,- ասաց կենտրոնի աշխատողներից մեկը:

Դիմում գրած աշխատակիցները հայտարարում են, որ իրենք արդեն մեկ տարի է բարձրաձայնում են, որ իրենց մասնագիտական դիրքորոշումը հաշվի չեն առել նման որոշում կայացնելու ժամանակ, բարձրաձայնում են՝ ՁԻԱՀ կենտրոնի և «Նորքի» ինֆեկցիոնի միավումն վտանգավոր է երկրի համար, երկրի անվտանգության համար ՁԻԱՀ առումով:

Նրանք իրենց կարծիքը հայտնել են գրավոր, բանավոր,  բողոքի ակցիաների ժամանակ, մասնագետների գերակշիռ մասը նույնիսկ ազատման դիմում է գրել:

«Արդեն երկու շաբաթ  անցել է, ինչ դիմումները գրել ենք, բողոքի ակցիաներ ենք անում, մինչ օրս մեր կարծիքը չլսվեց, ընդհակառակը բավականին մեծ ճնշումներ են գործադրվում մեր մասնագետների վրա՝ և հոգեբանական, և այլ մեթոդներ կիրառվեցին: Այդ մեթոդներից մեկն էլ այն է, որ այդ 26 աշխատակցի դիմումները մակագրեցին, որպեսզի վախեցնեն մյուսներին, որ կմակագրեն, կազատեն աշխատանքից»,- ասաց բողոքողներից մեկը:

«Դրական մարդկանց հայկական ցանց» ՀԿ ղեկավար Անահիտ Հարությունյանն ասաց, որ այստեղ է իրենց ՀԿ-ի շահառուների հետ, որոնք ՄԻԱՎ-ով մարդիկ են: Նրանք կառավարության դիմաց էին եկել  դիմակներով: 

«Նրանք են մեզ զանգել, անհանգստություն հայտնել ստեղծված իրավիճակից, ուզել են կանգնել իրենց բժիշկների կողքին: Նրանցից միայն մեկն է առանց դիմակի, բարձրաձայնում է, որ ՄԻԱՎ ունի: Նրա կինն առողջ է, երեխան առողջ է ծնվել և այդ ամբողջը ՁԻԱՀ կենտրոնի մասնագետների ձեռբերումն է»,- նշեց ՀԿ նախագահը:

Ա. Հարությունյանի  խոսքով, առողջապահության նախարարությունն ավելի շատ ջայլամի քաղաքականություն է տանում:

«Եթե մասնագետները դուրս են եկել փողոց ու ասում են՝ խնդիր ունենք, փոխանակ կանչեն, ճեպազրույց են տալիս, վարչապետին ինֆորմացիա են տալիս, թե տնօրենի խնդիր է: Այս կարգի սուտ  ինֆորմացիա տալով ու մասնագետներին չնստեցնելով քննարկման, շատ լուրջ խնդիրներ կունենանք»,- նշեց նա: