Ձեր վստահելի աղբյուրը

«Այսօր ունեցել ենք ԼՀԿ խորհրդի նիստ, որի ընթացքում քննարկել ենք երկրում ստեղծված վիճակը՝ ԱՀԿ հայտարարած համաճարակի հետ կապված»,- այս մասին ֆեյսբուքյան ուղիղ եթերով ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

Նրա խոսքով, քննարկվել են խմբակցության անելիքները՝ երեկ Հայաստանում հայտնաբերված կորոնավիրուսի 3 նոր դեպքերի ֆոնին։

«Կուսակցության խորհուրրդը կարծում է, որ ստեղծված իրավիճակում բոլոր տեսակի զանգվածային միջոցառումները պետք է հետաձգվեն։ Եվ երկիրը պետք է անցնի արտակարգ կառավարման միջոցների, որով մենք կկարողանանք համաճարակի տարածումը կանխել»,- ասաց Մարուքյանն, ապա հավելեց՝ պետք է բոլոր տեսակի զանգվածային միջոցառումները  հետաձգել՝ քարոզարշավից մինչև հարսանիք։

Մարուքյանը շեշտեց, խոսքը վերաբերում է նաև Արցախի Հանրապետությանը, որտեղ նույնպես պետք է զանգվածային միջոցառումները հետաձգվեն։ Ըստ պատգամավորի, որևէ տարբերություն չկա՝ Լոռու մարզում հետաձգվեց որևէ զանգվածային միջոցառում, թե Արցախում։

«Հանրաքվեն, Արցախի նախագահի և խորհրդարանական ընտրությունները միանշանակ պետք է հետաձգվեն։ Մենք կարծում ենք պետք է համախմբված լինեն իշխանությունը, ընդդիմությունն ու քաղհասարակությունը, որ Հայաստանը չընկնի համաշխարհային համաճարակի հարվածի տակ։ Երբ ժամանակին ասում էինք՝ պետք է Երևան-Միլան չվերթները դադարեցնել, արհամարհվեց մեր ասածը, բայց հենց Իտալիայից եկավ վիրուսը։ Այսօր էլ ասում ենք՝ պետք է բոլոր ուսումնական հաստատությունները փակվեն, և մենք նկատի ունենք այն, ինչ մեզ սպասվում է։ Քանի շատացան այս դեպքերն, այդքան մեծ խնդիր է լինելու։ Մարդիկ պետք է իրարից 1-2 մետր հեռավորություն պահպանեն, բայց դա անհնար է զանգվածային միջոցառման ժամանակ»,- ասաց Մարուքյանը։