Ձեր վստահելի աղբյուրը

Վրաստանի կառավարական բոլոր մարմիններն անցում են աշխատանքի արտակարգ՝ 24-ժամյա ռեժիմի նոր կորոնավիրուսի տարածման հետ կապված: sputnik-georgia.ru-ի հաղորդմամբ, այս մասին կառավարության նիստին հայտարարել է երկրի վարչապետ Գեորգի Գախարիան:

«Դա հատկապես վերաբերում է առողջապահության, կրթության, արտաքին գործերի, արդարադատոթյան, բնականաբար, ներքին գործերի և ֆինանսների նախարարություններին»,- ասել է Գախարիան:

Միաժամանակ Վրաստանի կառավարության ղեկավարը կոչ է արել բնակչությանը պահպանել հանգստություն:

Վրաստանի խորհրդարանը նույնպես անցնում է աշխատանքի արտակարգ ռեժիմի: Խոսնակն ասել է, որ կարգադրությամբ արգելում են խորհրդարան մտնել այն պատգամավորներին ու աշխատակիցներին, որոնք վերջին յոթ օրվա ընթացքում եղել են ռիսկային երկրներում կամ շփում են ունեցել COVID-2019-ով հնարավոր վարակվածներից հետ: Նրանց խորհրուրդ են տալիս երկու շաբաթով ինքնամեկուսանալ:

Մարտի 12-ի տվյալներով,  Վրաստանում հաստատված է կորոնավիրուսով վարակման 24 դեպք, որը 1-ով աճել է երեկվա համեմատ, 295-ը կարանտինի տակ են (նախօրեին՝ 126), իսկ 49-ը՝ բժշկական հսկողության (նախօրեին՝ 46)։