Ձեր վստահելի աղբյուրը

Հայաստանում օրական արտադրվում է մոտ 6-7 տոննա ախտահանիչ ալկոգել նյութ, խոշոր դեղատնային ցանցերը ստանում են առավոտյան, արագ վաճառվում է: Լրագրողների հետ զրույցում ասաց ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը:

«Եթե բնակչության թվով հաշվում ենք, դա, կարծես թե, բավականացնում է: Նաև պահեստավորված որոշակի խմբաքանակ կա»,- նշեց նա:

Գ.Գևորգյանի խոսքով, ալկոգելի մասով գնային փոփոխություն չկա: 

Ինչ վերաբերում է դիմակներին, ՏՄՊՊՀ նախագահը նշեց, քանի որ տարբեր աղբյուրներից են ձեռք բերում ու տարբեր գներով, այստեղ գնային փոփոխություններ կան:

«Սակայն մեր տնտեսվարողները հայտնում են, որ գների նվազման միտում կա, քանի որ Չինաստանն էլ է վաճառքի առաջարկ արել: Հիմա շուկայում մեծածախի մասով 150-200 դրամ է»,- ասաց Գ.Գևորգյանը:

Նա նշեց, որ դիմակների բավականաչափ խմբաքանակ մտել է Հայաստան:

ՏՄՊՊՀ նախագահի փոխանցմամբ, նաև տնտեսվարողները սկսել են որոշակի փոքր, լոկալ արտադրություններ, սակայն գինը մոտ 200 դրամ է կազմում:

«Եթե պետությունը ցանկանա գնել, անհրաժեշտություն լինի, առողջապահության նախարարության, տնտեսվարողների հետ կապի մեջ ենք, կարող են ապահովել պահանջարկը»,- նշեց պաշտոնյան: 

Հարցին՝ ի՞նչ եք կարծում, Հայաստանում դիմակների, ախտահանիչ միջոցների դեֆիցիտ կարող է լինել, նա ասաց. «Ախտահանիչների դեֆիցիտ չկա, եթե խոսքը  ալկոգելի մասին է: Ուղղակի խնդիրն այն էր, որ արտադրողները չէին կարող պատկերացնել, որ այս ծավալի պահանջարկ կլինի, բայց կարողացան կարճ ժամկետում փոփոխություններ կատարել արտադրական ծավալի մեջ ու երեք տնտեսավորղ սուբյեկտ կարողանում են այդ ծավալի արտադրել: Ալկոգելի արտադրության գլխավոր հումքը ևս արտադրվում է Հայաստանում»:

Պատասխանելով հարցին՝ խանութներում չկա՞  մթերքի հետ կապված խուճապ, դեֆիցիտ առաջանալու վտանգ, ինչպես, օրինակ, Եվրոպայում մթերային խանութները դատարկվել էին, Գ.Գևորգյանն ասաց, որ հանդիպել է խոշոր  առևտրային ցանցերի ղեկավարների հետ, իրենց մոտ որևէ խնդիր, խուճապ չկա:

«Մի երկու օր է եղել, որ քաղաքացիները մեծ ծավալի գնումներ են արել, բայց պահեստներից բերել լրացրել են»,- ասաց ՏՄՊՊՀ նախագահ Գեղամ Գևորգյանը